Rəsmi / Qanunvericilik / Heydər Əliyev Fondunda / Təhsil Nazirliyində / Pedaqoji yazılar / Müsahibələr / İdman / Elanlar / Arxiv

Qrant müsabiqəsi üzrə qalib layihələr
Audio dərsliklər hazırlanıb
12.01.2018 / No01


 

 

 


“Təhsildə inkişaf və innovasiyalar üzrə 1-ci qrant müsabiqəsi” çərçivəsində dəstəklənən 120 layihənin 32-si Bakı Şəhəri üzrə Təhsil İdarəsinin (BŞTİ) tabeliyindəki ümumi təhsil müəssisələrində icra edilir. Həmin layihələrin 15-i ümumi təhsil müəssisələri, 17-si fərdi kateqoriya üzrə qalib layihələrdir. Layihələr 3-12 ay müddətində icra ediləcək.

BŞTİ-nin tabeliyindəki məktəblərdə hazırda müxtəlif mövzuları əhatə edən layihələrin icra olunması ilə əlaqədar müvafiq tədbirlər həyata keçirilir. Konfrans, “dəyirmi masa”, seminar, mühazirə, “açıq dərs” və görüşlər, şagirdlərin qarşılıqlı səfərləri təşkil edilir.

Layihələrin həyata keçirilməsi, ilk növbədə, məktəb mühitində canlanma yaradır. İndi hər kəs ideya və əməyə görə dəyərləndirməni daha real görür, həm ümumi təhsil müəssisələri, həm də ayrı-ayrı müəllimlər dövlət dəstəyini daha yaxından hiss edir. Bundan başqa, məktəblər və müəllimlər arasında sağlam rəqabət mühiti möhkəmlənir, yeni ideyaların axtarışı istiqamətində işlər genişlənir.
“Təhsildə inkişaf və innovasiyalar üzrə 1-ci qrant müsabiqəsi” çərçivəsində reallaşdırılan layihələrin uğurları yeni ideyaların meydana gəlməsinə və təşəbbüskarlığın artmasına zəmin yaradır. Xüsusilə qeyd olunmalıdır ki, görülən işlərdən şagirdlər də örnək alır. Bu da onların gələcək nailiyyətlərinə müsbət təsir göstərir.
 


Mətnlərin disklərə yazılması məktəblilərin dərsi daha tez və asan qavramasına kömək edib

Səfurə RƏHİMOVA,
285 nömrəli tam orta məktəbin direktoru

Məktəblilər üçün audio dərsliklər hazırlanıb. Audio dərsliklər Bakı Şəhəri üzrə Təhsil İdarəsinin tabeliyindəki 285 nömrəli tam orta məktəbin “Təhsildə inkişaf və innovasiyalar üzrə 1-ci qrant müsabiqəsi” çərçivəsində dəstəklənən “Oxumadan öyrənək” layihəsi sayəsində ərsəyə gətirilib. Bu işə ötən il sentyabrın 22-dən etibarən 3 ay vaxt sərf edilib.

Dərsliklər diskə yazılıb

Audio disklər V sinif “Azərbaycan tarixi” və V sinif “Ədəbiyyat” dərslikləri əsasında hazırlanıb. Bunun üçün həmin dərsliklərin mətnləri nəzərdən keçirilib. Mətnlərin səsləndirilməsi üçün müvafiq məşqlər təşkil edilib. Sonra dərsliklərin mətnləri səsləndirilib və dərsliklərdəki ardıcıllığa uyğun olaraq, diskə yazılıb.

Beləliklə, V sinif “Azərbaycan tarixi” və V sinif “Ədəbiyyat” dərsliklərindəki bütün mətnlər ardıcıl şəkildə disklərə köçürülüb. Hər bir mətnin sonunda mövzuya uyğun suallar səsləndirilib. Layihə çərçivəsində elektron dərsliklərdən bəhs edən sosial çarx da hazırlanıb.

Məktəblilərə kömək

Audio dərsliklər ilk növbədə görmə qabiliyyəti zəif olan məktəblilərə kömək edir. Çünki təcrübə göstərir ki, həkim tərəfindən mütaliəyə icazə verilməyən və ya müəyyən səbəbdən bir müddət prosesdən uzaq durmalı olan şagirdlər dərslikləri başqasına oxutdurmaq məcburiyyətində qalırlar. Bu isə onların dərsi qavramasına və yadda saxlamasına mane olur. Buna görə də, belə şagirdlər dərsə hazırlıqsız gəlir, sinif yoldaşlarından geri qalırlar. Audio dərsliklər vasitəsilə artıq belə məktəblilər başqasından kömək gözləmədən dərslərinə hazırlaşa bilirlər.

Audio dərsliklər oxumağa həvəs göstərməyən şagirdlərə də kömək göstərir. Çünki audio disklər vasitəsilə dərsə hər yerdə hazırlaşmaq mümkündür. Yol gedərkən, istirahət edərkən və digər vəziyyətlərdə diskləri dinləməklə dərsə hazırlaşmaq olur.
Bundan başqa, məktəblilər evdən uzaqda olanda da dərsə hazırlaşa bilirlər. Onlar artıq uzaq məsafəyə kitab daşımır və diski dinləməklə dərsi öyrənirlər.

Audio dərsliklər məktəblilər arasında ən çox rast gəlinən onurğa sütununun əyriliyi probleminin də qarşısını alır. Çünki audio disklər kitabların çəkisi ilə müqayisədə olduqca yüngüldür.

Təcrübəyə əsasən deyə bilərik ki, audio dərsliklərdən istifadə əlverişlidir. Bu işin genişləndirilməsi və digər fənlər üzrə audio dərsliklərin hazırlanması səmərəli ola bilər.

yuxarı ⤴