1 2 3 4 5
Rəsmi / Qanunvericilik / Heydər Əliyev Fondunda / Təhsil Nazirliyində / Pedaqoji yazılar / Müsahibələr / İdman / Elanlar / Arxiv
//19.01.2018
//19.01.2018
//19.01.2018
//19.01.2018
//19.01.2018
 

Qrant müsabiqəsi üzrə qalib layihələr
Birlikdə gələcəyə...
12.01.2018 / No01


 

 

 


“Təhsildə inkişaf və innovasiyalar üzrə 1-ci qrant müsabiqəsi” çərçivəsində dəstəklənən 120 layihənin 32-si Bakı Şəhəri üzrə Təhsil İdarəsinin (BŞTİ) tabeliyindəki ümumi təhsil müəssisələrində icra edilir. Həmin layihələrin 15-i ümumi təhsil müəssisələri, 17-si fərdi kateqoriya üzrə qalib layihələrdir. Layihələr 3-12 ay müddətində icra ediləcək.

BŞTİ-nin tabeliyindəki məktəblərdə hazırda müxtəlif mövzuları əhatə edən layihələrin icra olunması ilə əlaqədar müvafiq tədbirlər həyata keçirilir. Konfrans, “dəyirmi masa”, seminar, mühazirə, “açıq dərs” və görüşlər, şagirdlərin qarşılıqlı səfərləri təşkil edilir.

Layihələrin həyata keçirilməsi, ilk növbədə, məktəb mühitində canlanma yaradır. İndi hər kəs ideya və əməyə görə dəyərləndirməni daha real görür, həm ümumi təhsil müəssisələri, həm də ayrı-ayrı müəllimlər dövlət dəstəyini daha yaxından hiss edir. Bundan başqa, məktəblər və müəllimlər arasında sağlam rəqabət mühiti möhkəmlənir, yeni ideyaların axtarışı istiqamətində işlər genişlənir.
“Təhsildə inkişaf və innovasiyalar üzrə 1-ci qrant müsabiqəsi” çərçivəsində reallaşdırılan layihələrin uğurları yeni ideyaların meydana gəlməsinə və təşəbbüskarlığın artmasına zəmin yaradır. Xüsusilə qeyd olunmalıdır ki, görülən işlərdən şagirdlər də örnək alır. Bu da onların gələcək nailiyyətlərinə müsbət təsir göstərir.
 


Məktəblərarası əməkdaşlığa xidmət edən layihə növbəti addımlara təkan verib

İradə HÜSEYNOVA,
304 nömrəli məktəb-liseyin direktoru

Bakı Şəhəri üzrə Təhsil İdarəsinin tabeliyindəki 304 nömrəli məktəb-lisey və 24 nömrəli tam orta məktəb arasında qurulan əməkdaşlıq çərçivəsində birgə tədbirlər həyata keçirilib. Tədbirlər 304 nömrəli məktəb-liseyin “Təhsildə inkişaf və innovasiyalar üzrə 1-ci qrant müsabiqəsi”ndə dəstəklənən “Birlikdə gələcəyə” layihəsi çərçivəsində reallaşdırılıb. Sentyabrın 22-dən etibarən 3 ay müddətində icra olunan layihənin məqsədi səmərəli rəqabət mühiti yaratmaqla məktəblərarası əməkdaşlığı inkişaf etdirməkdən ibarətdir.

Şagird və valideynlərlə iş

“Birlikdə gələcəyə” layihəsi çərçivəsində 304 nömrəli məktəb-lisey və 24 nömrəli tam orta məktəbin 180-ə yaxın VI, VII və VIII sinif şagirdləri hədəf seçilib. Məktəblilər arasında “Heydər Əliyev: Azərbaycanda təhsil, mədəniyyət və idmanın inkişafı“, “Mən Azərbaycanın gələcəyiyəm” mövzularında inşa müsabiqəsi, tarix, coğrafiya, biologiya, riyaziyyat, həyat bilgisi fənləri üzrə bilik yarışları, viktorinalar keçirilib. Həmçinin, şagirdlər idman turnirlərində qüvvələrini sınayıblar.

Bundan başqa, layihə iştirakçıları arasında “Qarabağın tarixi”, “Ekoloji təcavüzkarlıq” mövzularında diskussiyalar, Qala Arxeoloji-Etnoqrafik Muzey Kompleksinə ekskursiyalar təşkil edilib.

Həmçinin, layihə iştirakçıları proyektiv metodika üsulu ilə test edilib, onların valideynləri arasında sorğular keçirilib. Valideynlərə övladlarının təhsil aldığı məktəblə sağlam və səmərəli əməkdaşlığın inkişaf etdirilməsinə dair psixoloji xidmət göstərilib.
Layihədə hər iki təhsil müəssisəsinin müəllimləri də fəal iştirak edib, təcrübələrini bölüşüblər.

Birgə layihələr üçün nümunə

Layihənin reallaşdırılması nəticəsində 304 nömrəli məktəb-lisey və 24 nömrəli tam orta məktəbin şagirdlərinin birgə fəaliyyətləri onların ictimai fəallığının, özünüifadə, ünsiyyət, müstəqil bilik əldə etmək bacarıqlarının inkişafına, dünyagörüşünün, olimpiada, müsabiqə və yarışlara marağının artmasına səbəb olub. Eyni zamanda, müəllimlər arasında əməkdaşlığın yaranmasına, onların yeni layihələrə marağının yüksəlməsinə şərait yaradıb.

Ümumilikdə, “Birlikdə gələcəyə” layihəsi məktəblərarası əməkdaşlıq üçün nümunə olub. Layihə çərçivəsində qazanılan təcrübə gələcəkdə bu istiqamətdə yeni layihələrin həyata keçirilməsinə kömək edəcək.
 

yuxarı ⤴