Təhsil Nazirliyinin birbaşa tabeliyindəki “Tərəqqi” texniki-humanitar liseyində Xocalı faciəsinin 25-ci ildönümünə həsr olunmuş “Tarixin bir günü, ya bir günün tarixi” mövzusunda ədəbi-bədii anım tədbiri keçirilib. Dövlət himninin ifası ilə başlayan tədbirdə öncə Xocalı qətliamında və azadlıq uğrunda mübarizələrdə həlak olan vətən oğul və qızlarının xatirəsi bir dəqiqəlik sükütla anılıb. Sonra aparıcılar Ləman və Fidan tədbiri açıb, “Bayatı Şiraz” muğamının sədaları altında bayatılar söyləyiblər.
Tədbirin iştirakçısı olan müəllimlər, valideynlər və şagirdlər daha sonra “Mən Xocalıyam” adlı kompozisiyanı dinləyiblər. Liseyin Azərbaycan və rus bölmələrindən olan istedadlı şagirdlərinin təqdim etdikləri ədəbi-bədii kompozisiya iştirakçılarda kövrək anlar yaşadıb. Şagirdlərdən Fuad, Kənan, Adəm, Bəybala, Elmira, Nigar, Alina və başqaları Xocalı faciəsi haqqında danışıb, soyqırımı zamanı ermənilərin törətdikləri vəhşilikləri sübut edən faktları dilə gətiriblər. Məktəblilərdən Selcan, Günel, Nigar, Vüsal, Vəfa, Sürəyya, Zəhra, Fatimə, Fidan, Ayna, Dəniz və b. Xocalı hadisələrinə həsr olunmuş “O gecə”, “O qızın göz yaşları”, “Laylay, Xocalım, laylay”, “Ağlama, ana, ağlama”, “Xocalı harayı” şeirlərini söyləyiblər.
Tədbir boyu Xocalı dəhşətlərini əks etdirən videomaterial və bu soyqırımın dünya dövlətləri tərəfindən tanınmasına həsr edilmiş slaydlar nümayiş olunub. Sonra aparıcılar Xocalı soyqırımının həmişə xalqımızın yaddaşında matəm rəmzi kimi qalacağını, Heydər Əliyev Fondunun xəttilə həyata keçirilən “Xocalıya ədalət!” kampaniyasının nəticəsi olaraq getdikcə daha çox dövlətin bu faciəni soyqırım kimi tanıdığını bildiriblər. Qeyd olunub ki, ölkə Prezidenti İlham Əliyevin sərəncamına əsasən Cəbrayıl rayonunun Cocuq Mərcanlı kəndində başlanmış bərpa işləri və soydaşlarımızın öz yurd-yuvalarına dönməsi xalqımızda işğal olunmuş torpaqlarımızın tezliklə qaytarılacağına böyük ümidlər doğurub.
Sonda “Xocalı” filmindən mahnı səsləndirilib.

Sevda YARMETOVA,
“Tərəqqi” texniki-humanitar liseyinin tarix müəllimi