Bakı Slavyan Universitetinin (BSU) elmi işlər üzrə prorektoru, professor Rafiq Novruzov, Təcrübə və məzunların karyera inkişafı şöbəsinin müdiri, filologiya üzrə fəlsəfə doktoru, dosent Yaşar Alxasov Çerniqov Milli Texnologiya Universitetinin (ÇMTU) rəhbərliyinin dəvəti ilə bu şəhərdə işgüzar səfərdə olub. BSU nümayəndələrini ÇMTU-nun rektoru və elmi işlər üzrə prorektor qarşılayıb, proqram barədə qonaqlar ətraflı məlumatlandırılıblar. Azərbaycan nümayəndələri səfərin ikinci günü “Art dvor” sosial layihəsinin təqdimatında iştirak edib və yerli mətbuata müsahibələr veriblər.

Sonra BSU təmsilçiləri Çerniqov Milli Texnologiya Universitetində Azərbaycan Mədəni-Tədris Mərkəzinin və ÇMTU nəzdində Bazar Günü Azərbaycan Məktəbinin açılışlarına qatılıblar. Tədbirdən sonra Bakı Slavyan Universiteti ilə Çerniqov Milli Texnologiya Universiteti arasında əməkdaşlıq haqqında müqavilə və BSU ilə Şota Rustaveli adına Batumi Dövlət Universiteti və ÇMTU arasında əməkdaşlıq barədə memorandum imzalanıb.