Fərqli mühitin məktəbi

Özünəməxsus ənənələri ilə seçilən bir çox orta ümumtəhsil müəssisəsi var ki, bunlardan biri də İsmayıllı rayonundakı ümummilli lider Heydər Əliyevin adını daşıyan İvanovka kənd tam orta məktəbidir. Əslində, məktəbin özünəməxsusluğu məhz onun ölkəmizdə spesifikliyi ilə fərqlənən, hamının xüsusi maraq göstərdiyi məşhur İvanovka kəndində yerləşməsindədir. Ənənəmizə sadiq qalaraq oxucularımıza İvanovkanı və bu fərqli kənddəki sosial həyatı, ələlxüsus, məktəbi daha yaxından tanıtmaq məqsədilə kəndə yollandıq. Elə kəndin girişində buradakı fərqli ab-hava, qaynar həyat bizdə xoş təəssürat yaratdı.

 

Qısa arayış

 

İvanovka İsmayıllı rayonunun mərkəzindən 13 km cənub-qərbdə yerləşir. Kəndin əsası 1847-ci ildə Çar hökuməti dövründə Qafqaza köçürülən ruslar tərəfindən qoyulub. İvanovka adı yaşayış məskəninin yaradıcısı olan kəndli İvan Perşinin şərəfinə qoyulub. XIX əsrdə buraya köçürülən ruslar qısa zaman ərzində özlərinə yurd salıb. Yerli xalqlarla daim dostluq və sülh şəraitində yaşayan ruslar artıq iki əsrə yaxındır ki, burada məskunlaşıblar. İvanovkada ruslarla yanaşı, ləzgilər və az sayda azərbaycanlılar da yaşayırlar.

İvanovkanı digər kəndlərdən fərqləndirən cəhətlərdən biri isə evlərin, demək olar ki, eyni ölçüdə olması və bir-birinə bənzəməsidir. Kənddə maddi baxımdan imkanlı və imkansız insanların evləri seçilmir. Kəndin səciyyəvi xüsusiyyətlərindən biri və bəlkə də ən başlıcası isə hələ də burada kolxozun - ümumi təsərrüfatın qorunub saxlanılmasıdır. 1930-cu ildə İvanovkada da, hər yerdə olduğu kimi, kolxoz quruldu. Lakin müstəqillik illərində ölkənin hər yerində torpaq islahatları aparılaraq fərdi təsərrüfata keçilsə də, ivanovkalılar kolxoz təsərrüfatının dağıdılmamasını istədilər. Hazırda respublikamızda kolxoz təsərrüfatı olan yeganə kənd İvanovkadır. Kolxoz uzun illər təsərrüfata rəhbərlik edən, ivanovkalıların qəlbində xüsusi yeri olan Nikolay Vasilyeviç Nikitinin adını daşıyır. Hazırda kənddə 1000-ə yaxın təsərrüfat bu kolxozda cəmləşib. İvanovkalıların əsas məşğuliyyəti üzümçülük, taxılçılıq və heyvandarlıqdır. Kənddə istehsal olunan çaxır, süd məhsulları daxili bazarda öz yerini tutub.

 

İvanovka məktəbi

 

İvanovka məktəbi ikimərtəbəli binada yerləşir. 2006-cı ildə 700 yerlik yeni məktəb binası tikilərək şagirdlərin ixtiyarına verilib.

Tədris müəssisəsi müasir avadanlıqlarla təchiz olunub. Geniş, işıqlı sinif otaqları, fənn kabinetləri və fizika, kimya, informatika laboratoriyaları tədrisin yüksək səviyyədə aparılmasına şərait yaradır. Məktəbin dərsliklərdən və bədii ədəbiyyatdan ibarət zəngin kitabxanası var. Tədris ocağında təlim Azərbaycan və rus dillərində aparılır. 385 nəfər şagirdin təlim-tərbiyəsi ilə 40 müəllim məşğul olur.

 

“Bizim məktəb çoxmillətlidir”

 

Tədris ocağının direktor əvəzi Polina Radayeva bizimlə söhbətində bildirdi ki, məktəbdə təhsil yüksək səviyyədədir. Şagirdlərin davamiyyətinin, dərsə marağının yüksək olduğunu deyən P.Radayeva məktəbdə dərslərin müasir təlim metodları ilə keçildiyini qeyd etdi: “Şagirdlər arasında oxumaq üçün sağlam rəqabət mövcuddur. Müəllimlərimiz yüksək səviyyəli, peşəkar kadrlardır. Bizim məktəb çoxmillətlidir. Lakin buna baxmayaraq, onlar çox mehriban yaşayırlar. Məktəbimizin uğurları ilbəil artmaqdadır. Şagirdlərimiz həm Azərbaycanın, həm də Rusiyanın müxtəlif ali məktəblərinə qəbul olunurlar. Bundan başqa, fənn olimpiadalarında, müxtəlif müsabiqə və yarışlarda da şagirdlərimiz uğurla çıxış edirlər. Uşaqlarımız idmanı çox sevirlər. Məktəbimizin həndbol, voleybol, futbol komandaları mövcuddur. Bu komandalar tez-tez rayon və respublika birinciliklərində iştirak edirlər”.

Direktor əvəzi təhsil müəssisəsində mütaliə vərdişlərinin formalaşması istiqamətində, dərsdənkənar məşgələlər və şagirdlərin asudə vaxtlarının təşkili ilə bağlı sistemli işlərin görüldüyünü də dedi. “Məktəbimizdə xüsusi istedadı olan uşaqlar çoxdur. Onların içərisində rəsm çəkməyi, yaxşı şeir söyləməyi bacaran, əl işlərindən ibarət müxtəlif əşyalar düzəldən şagirdlər mövcuddur. Həmin şagirdlər respublikamızdakı müsabiqə və yarışlarda məktəbimizi layiqincə təmsil edirlər. Eyni zamanda, Rusiyanın Azərbaycandakı səfirliyinin təşkil etdiyi tədbirlərə də qatılırlar. Onu da qeyd edim ki, Rusiya səfirliyi də bizi daim diqqətdə saxlayır. Səfirliyin rus dili ilə bağlı keçirdiyi olimpiada və müsabiqələrdə fəal iştirak edirik”.    

 

Məktəb-kolxoz əlaqələri

 

Məktəbin kolxozla olan əlaqələrindən də danışan P.Radayeva şagirdlərin valideynlərinin əksəriyyətinin kolxozçular olduğunu və buna görə də kolxoz rəhbərliyinin məktəbi daim diqqətdə saxladığını nəzərə çatdırdı. Şagirdlərin də ara-sıra kolxozun işinə kömək etdiyini dedi: “Kolxoz bizə çox yardım göstərir. Məsələn, məktəbimizə kolxoz tərəfindən avtobus verilib. Bu avtobusla şagirdlər məktəbə daha rahat şəkildə gəlib-gedirlər. Bəzən kolxozun işində müəllim və şagirdlərin köməyinə ehtiyac duyulur. Əgər kolxoza üzüm yığımı üçün kömək lazımdırsa, onlar bizə müraciət edirlər. Biz də öz növbəmizdə iməciliklər qurur, yuxarı sinif şagirdləri və müəllimlər üzüm yığımında kolxozçulara kömək edirlər. Əlbəttə, biz də onların diqqətindən kənar qalmırıq. Onlar biz müəllimlərə müxtəlif vaxtlarda taxıl, günəbaxan yağı, bayramlarda isə ət və digər ərzaq məhsulları verirlər. Beləcə, kolxozla qarşılıqlı, sıx əlaqələrimizi davam etdiririk. Problemlərin birgə həllinə çalışırıq”.

 

Məktəbdə mütaliə vərdişlərinin artırılmasına xüsusi diqqət yetirilir

 

Məktəbin Azərbaycan dili və ədəbiyyat müəllimi Rüxsarə Qasımova rusdilli şagirdlərin Azərbaycan dilini öyrənməyə çox maraqlı olduğunu bildirdi. O, məktəbdə mütaliə vərdişlərinin artırılması istiqamətində mütəmadi olaraq işlər aparıldığını da dedi: “Məktəbdə istər rus, istərsə də Azərbaycan bölməsində tez-tez tədbirlər təşkil edirik. Müxtəlif şair və yazıçıların yaradıcılığını öyrətmək məqsədilə ədəbiyyat gecələri keçirilir. Şagirdlər bu tədbirlərə xüsusi maraqla hazırlaşır. Kəndimiz beynəlmiləl kənd olduğu üçün tədbirlərimiz daha rəngarəng keçir. Burada şagirdlər həm rus, həm də Azərbaycan dilində nəğmələr oxuyur, şeirlər söyləyirlər”. 

 

“Kəndin əhalisi çox mehribandır”

 

Məktəbin riyaziyyat müəllimi Aysel Məmmədova İvanovka məktəbində bu ildən işlədiyini deyir. Kəndə başqa yerdən gəlməsinə baxmayaraq, qısa müddət ərzində məktəbə alışdığını bildirir: “Kəndin əhalisi çox mehriban, qonaqpərvərdir. Gəldiyim ilk gündən kənd və məktəb məni özünə valeh etdi. Müəllimlərin münasibəti də çox yaxşıdır. Burada özümü evimdəki kimi hiss edirəm. Məni bu kəndə cəlb edən amillərdən biri də burada fərqli mədəniyyətin, adət-ənənənin olmasıdır. Şagirdlərimiz dərslərdə çox fəaldır. Onlar daha çox öyrənməyə, tədqiqat aparmağa meyillidir. Bu, biz müəllimləri çox sevindirir”.

 

“Harada olsaq da, bizim üçün doğma məktəbimiz daha əzizdir”

 

Məktəbin XI sinif şagirdi Anna Orlova bir çox olimpiada və müsabiqələrin iştirakçısı olduğunu deyir: “Bizim məktəb mənim çox xoşuma gəlir, çünki burada çox gözəl müəllimlər var. Onlar şagirdlərə məlumatı çox asan və maraqlı təqdim edirlər. Həmçinin, biz rayon və respublika səviyyəli müxtəlif olimpiadalarda, müsabiqələrdə iştirak edirik. Məktəbimizin şagirdləri respublika müsabiqələrində və beynəlxalq bilik yarışlarında uğurlar əldə edirlər. Mən özüm Rusiya səfirliyi tərəfindən hər il təşkil olunan rus dili və ədəbiyyatı ilə bağlı müsabiqədə məktəbimizi təmsil etmişəm və qaliblər sırasında olduğum üçün qürur duyuram. Onu da deyim ki, həmin müsabiqədə qalib olduğum üçün səfirlik bizi 10 gün müddətinə Rusiyanın Moskva, Vladimir, Pskov, Suzdal və Kazan şəhərlərinə səfərə göndərdi. Səfər müddətində həmin şəhərlərlə yaxından tanış olduq. Orada müxtəlif muzeyləri və tarixi yerləri gəzdik. Bu, çox gözəl bir hiss idi. Lakin harada olsaq da, bizim üçün İvanovka, doğma məktəbimiz daha əzizdir”.

 

Niyazi RƏHİMOV



09.02.2018 | 09:30