“Azneft” ŞHK komandası 5 oyuna 7 kubok qazanıb

Fevralın 13-də Azərbaycan Dövlət Neft və Sənaye Universitetinin (ADNSU) rektoru, professor Mustafa Babanlı Rusiyanın Soçi şəhərində keçirilən “KiViN-2018” beynəlxalq yarışmasında uğurla çıxış edən universitetin “Azneft” Şən və Hazırcavablar Klubu (ŞHK) komandasının üzvləri ilə görüşüb. Görüşdə ADNSU-nun tərbiyə işləri üzrə prorektoru, dosent Ata Babayev və Tələbə Həmkarlar İttifaqı Komitəsinin sədri Namiq Gəncəyev iştirak edib.

“Azneft” komandasının üzvlərini uğurlu çıxış üçün təbrik edən rektor, professor Mustafa Babanlı onların gələcək yarışlarda daha yüksək nəticələr qazanacaqlarına inandığını bildirib. Tələbələrin asudə vaxtlarından səmərəli istifadə etməsi üçün universitetdə hər cür şəraitin olduğunu deyən rektor M.Babanlı istedadlı gənclərə hər zaman dəstək verildiyini qeyd edib.

“Azneft” komandasının bədii rəhbəri Böyükağa Əliyev göstərilən qayğıya görə  universitet rəhbərliyinə  minnətdarlığını bildirib. “Azneft”-in son iki ildəki  uğurlarından danışan B.Əliyev komandanın iştirak etdiyi 5 oyuna 7 kubok qazandığını diqqətə çatdırıb.

Sonda ADNSU-nun “Azneft” komandasının Soçi şəhərində keçirilən “KiViN-2018” beynəlxalq yarışmasında iştirakına aid videoçarx nümayiş olunub.



13.02.2018 | 16:40