Fevralın 12-də Azərbaycan Prezidenti İlham Əliyev Heydər Əliyev Fondunun təşəbbüsü ilə inşa edilmiş Habil Əliyev adına Ağdaş Şəhər Musiqi Məktəbində olub.

Tikintisinə 2008-ci ilin martında başlanmış 540 şagird yeri olan musiqi məktəbinin binası ötən ilin iyununda istifadəyə verilib. Ağdaş şəhərinin mərkəzində yerləşən məktəbdə 36 sinif otağı, 200 yerlik konsert zalı və muzey vardır.

Prezident İlham Əliyev məktəbdəki Habil Əliyev muzeyinə baxıb. Muzeyin ən qiymətli eksponatları arasında Habil Əliyevin vaxtilə ulu öndər Heydər Əliyevlə, həmçinin Heydər Əliyev Fondunun kamança ustadına və bütövlükdə musiqi mədəniyyətimizə göstərdiyi qayğını əks etdirən şəkillər vardır.

Sonra Prezident İlham Əliyev məktəbdə təlim prosesi ilə tanış olub, konsert salonunda məktəbin ansamblının ifasında dahi Üzeyir Hacıbəylinin “Koroğlu” operasından bir parçanı dinləyib.