Dekabrın 28-də Təhsil Nazirliyində uşaq-gənclər
idman və şahmat məktəbləri, idmançı və
məşqçi-müəllimlər arasında keçirilmiş VIII
Respublika müsabiqəsinin yekununa həsr olunmuş
mərasim keçirildi.
Təhsil
Nazirliyinin məsul işçilərinin, şöbə və müvafiq
struktur bölmə rəhbərlərinin, idman
məktəblərinin nümayəndələrinin, müsabiqə
qaliblərinin və KİV təmsilçilərinin iştirak
etdiyi mərasimi açan təhsil naziri Misir
Mərdanov qonaqları salamladı və dəvəti qəbul
etdikləri üçün onlara öz təşəkkürünü bildirdi.
Ölkəmizdə bədən tərbiyəsi və idmanın inkişafının
dövlət üçün mühüm əhəmiyyət kəsb edən
məsələlərdən biri olduğunu deyən nazir qeyd etdi
ki, Azərbaycan xalqının ümummilli lideri Heydər
Əliyevin hakimiyyətdə olduğu dövrlərdə bu sahəyə
xüsusi dövlət qayğısı göstərilmişdir. Hazırda da
ölkə başçısı, Heydər Əliyev siyasi kursunun
layiqli davamçısı, Milli Olimpiya Komitəsinin
Prezidenti cənab İlham Əliyevin fəaliyyətində
bədən tərbiyəsi və idmanın inkişafı prioritet
sahələrdən biridir.
İdmanın futbol və şahmat növlərinin daha da
inkişaf etdirilməsi üçün Prezidentin
sərəncamları ilə Dövlət Proqramlarının qəbul
edildiyini və bu proqramların yerinə yetirilməsi
məqsədilə Təhsil Nazirliyi tərəfindən tədbirlər
planlarının hazırlandığını bildirən təhsil
naziri həmin istiqamətdə görülən işləri mərasim
iştirakçılarının diqqətinə çatdırdı. Qeyd olundu
ki, Gəncə şəhərində futbol təmayüllü internat
tipli gimnaziya, Bakı şəhərində "Təhsil"
Respublika İdman Mərkəzinin Uşaq-Gənclər Futbol
Məktəbi yaradılmışdır. AFFA-nın köməyi ilə bir
neçə orta məktəbdə süni örtüklü futbol
meydançası inşa edilmişdir. 2010-cu ildə idman
məktəblərinin maddi-texniki bazalarının
möhkəmləndirilməsi məqsədilə bir sıra mühüm
tədbirlər həyata keçirilmişdir.
Nazirlik tərəfindən mərkəzləşdirilmiş qaydada
bütün şahmat məktəbləri üçün inventarlar,
kompüter avadanlıqları və əyani vəsaitlər
alınaraq paylanmışdır. Hazırda həmin məktəblər
üçün elektron tədris vəsaitləri hazırlanıb və
yaxın vaxtlarda onların istifadəsinə
veriləcəkdir.
Təhsil Nazirliyi sistemində 159 idman məktəbinin
fəaliyyət göstərdiyini bildirən Misir Mərdanov
məlumat verdi ki, bu məktəblərdə 27 idman növü
inkişaf etdirilir. 457 bölmədə 8664 qrupda
107106 nəfər uşaq, yeniyetmə və gənc idmanla
məşğul olur. Həmin müəssisələrdə 5069 nəfər
məşqçi-müəllim işləyir.
Təhsil Nazirliyi sistemində fəaliyyət göstərən
idman və şahmat məktəblərinin yetirmələri
2010-cu ildə respublika və beynəlxalq yarışlarda
bütövlükdə 1886 medal qazanmışlar. Beynəlxalq
turnirlərdə, Avropa, dünya birincilikləri və
çempionatlarında 178 medal qazanılmışdır. Bu il
idman növləri üzrə 1918 nəfər yüksək dərəcəli
idmançı hazırlanıb.
Dövlət tərəfindən göstərilən yüksək qayğı
nəticəsində 2010-cu il şahmatçılarımız üçün
xüsusilə uğurlu olub. Onlar Avropa, dünya
birincilikləri və çempionatlarında böyük ustalıq
və qabiliyyət nümayiş etdirərək 15 medal
qazanmışlar (10 qızıl, 2 gümüş, 3 bürünc). Bu
yarışlarda şahmatçılarımız ilk dəfə olaraq
komanda hesabında birinci olmuşlar.
Keçirilən müsabiqə haqqında danışan nazir bu
tədbirdə Təhsil Nazirliyi sistemində fəaliyyət
göstərən bütün idman və şahmat məktəblərinin
iştirak etdiyini vurğuladı.
Daha sonra təhsil naziri 12 nominasiya üzrə
təşkil olunmuş VIII Respublika müsabiqəsinin
qaliblərini mərasim iştirakçılarına təqdim etdi
və onlara ən xoş arzularını bildirdi. Qaliblərə
diplomlar və hədiyyələr verildi.
Tədbirdə qaliblər adından çıxış edən Bakı şəhər
19 nömrəli Uşaq-Gənclər İdman Məktəbinin
direktoru Suliddin Fərzəliyev, gənclər arasında
şahmat üzrə dünya çempionu Nərmin Kazımova və
"Təhsil" Respublika İdman Mərkəzinin direktoru
Cəfər Hümbətov ölkəmizdə idmanın inkişafına
göstərilən dövlət qayğısından söz açdılar və bu
diqqətin nəticəsi olaraq gələcəkdə idmançıların
uğurlarının daha da artacağına əmin olduqlarını
bildirdilər. Gənclər və idman nazirinin müavini
İsmayıl İsmayılov qalibləri təbrik edərək onlara
yeni-yeni nailiyyətlər qazanmağı arzuladı.
Hicran ƏKBƏROVA |