Rusiya
Federasiyasında artıq 2 ildir ki, ali
məktəblərin reytinqi açıqlanır. Ölkənin nüfuzlu
xəbər agentliklərindən hesab olunan "İnterfaks"
agentliyi və "Exo Moskvı" radiostansiyası 2
ildir ki, davamlı olaraq Rusiyanın ali
məktəblərinin reytinqini təşkil edirlər. Ötən
ilki reytinq ali məktəbləri 2 kateqoriya üzrə -
klassik və hüquq universitetləri və digər
kateqoriyalardan 50 ali təhsil ocağı üzrə təhlil
edib.
Cari ildə tədqiq olunan obyektlərin tərkibi
genişləndirilib. Klassik universitetlərdən başqa
reytinqə milli tədqiqat universitetləri (həm
tədqiqat, həm də təhsil müəssisəsi hesab
olunanlar) də cəlb olunub. Bütövlükdə bu
qəbildən olan universitetlər sırasına 29 elmi
tədqiqat universiteti daxil olub. Ötən il RF-də
"Müəllim ili" olduğundan pedaqoji, humanitar,
linqvistik ali məktəblərin reytinqi də tərtib
olunub. 2011-ci ilin reytinq cədvəli 104
universitet və 71 pedaqoji ali məktəbi əhatə
edir. Reytinq cədvəli tərtib olunarkən
universitetlərin innovasiya və tədqiqatçılıq
fəaliyyətinə xüsusi diqqət yetirilib. Metodoloji
kriteriya kimi "İnnovasiya və elmi işlərin
kommersiyalaşdırılması" əsas götürülüb. Reytinq
cədvəlinə əsasən ilk beşliyə aşağıdakı
universitetlər daxildir: M.V.Lomonosov adına
Moskva Dövlət Universiteti, Sankt-Peterburq
Dövlət Universiteti, Moskva Fizika Texnika
İnstitutu (elmi tədqiqat statuslu), Rusiya
Xalqlar Dostluğu Universiteti, Novosibirsk və
Tomsk Dövlət universitetləri (5-6-cı yerləri
bölüşürlər). Reytinq cədvəlinin tərtib olunması
metodologiyasında dəyişikliklərdən sonra ilk
onluğa Bauman və Sankt-Peterburq Politexnik,
Sibir Federal universitetləri də daxil olublar.
Ali məktəblərin reytinqi abituriyentlər və
onların valideynləri üçün əhəmiyyət kəsb edir.
Reytinq bu və ya digər universitetin nə dərəcədə
keyfiyyətli təhsil verməsini göstərir. Nüfuz
cədvəli həm də işəgötürənlər üçün də kadrların
seçimində oriyentir hesab oluna bilər. Ali
məktəblərin özləri də reytinq cədvəlinin
açıqlanmasında maraqlıdırlar. Bu, onlara öz
işlərini daha yaxşı qurmağa və fəaliyyətlərinin
keyfiyyətini yüksəltməyə imkan verir.
RF-də hesab edirlər ki, reytinq cədvəli milli
təhsil sisteminin beynəlxalq rəqabət
qabiliyyətinin güclənməsinə xidmət edir. |