|
Xəbər verildiyi kimi, Bakının Səbail və Quba
rayon icra hakimiyyətləri və DİN Daxili
Qoşunlarının birgə təşkilatçılığı ilə Qubada
ənənəvi hərbi-vətənpərvərlik təmayüllü ödənişsiz
"Şahinlər" yay istirahət düşərgəsi
yaradılmışdır. Quba rayonundakı Özəl Türk
Liseyinin bazasında fəaliyyət göstərən düşərgədə
Səbail rayonunun Qarabağ müharibəsi veteranları
və əlillərinin, aztəminatlı ailələrinin
uşaqları, "SOS-Azərbaycan" uşaq kəndində və Quba
rayonu Zərdabi adına xüsusi internat-məktəbdə
tərbiyə alan ümumilikdə 200 nəfər yeniyetmənin
yay istirahətinin mənalı və səmərəli təşkili,
onların Vətənə məhəbbət və dövlətçilik ruhunda
tərbiyəsi istiqamətində əhəmiyyətli tədbirlər
həyata keçirilir.
Düşərgənin rəhbəri Faiq Qurbanovun bildirdiyinə
görə, burada istirahət prosesi təsdiq olunmuş iş
planına uyğun aparılır. Keçirilən məşğələlərlə
yanaşı, günün sərin vaxtlarında müxtəlif idman
yarışları təşkil olunur. Yeniyetmələr Daxili
Qoşunların zabit və əsgərlərinin köməyi ilə
hərbi nizamnamə, orduda xidmət qaydaları, silah
və texnika ilə yaxından tanış olur, Qubanın
görməli yerlərinə ekskursiyaya gedirlər. Layihə
təşkilatçıları düşərgənin fəaliyyətini daim
nəzarətdə saxlayırlar. Burada müntəzəm olaraq
filmlər, konsert proqramları nümayiş olunur,
müxtəlif görüşlər keçirilir. Bu günlərdə
yeniyetmələr Quba rayonundakı soyqırımı
məzarlığını ziyarət etmişlər.
"Şahinlər" hərbi-vətənpərvərlik təmayüllü yay
istirahət düşərgəsində yeniyetmələrin mənalı
istirahəti davam edir.
Hicran ƏKBƏROVA |
|
