Fevralın
9-da Bakıdakı Land Mark Hoteldə Avropa İttifaqı -
Azərbaycan Əməkdaşlıq Komitəsi çərçivəsində yaradılmış
alt-komitənin iclası keçirildi. Tədbirdə təhsil
nazirinin müavini Qulu Novruzov, Azərbaycanın müxtəlif
qurumlarının sektor və şöbə müdirləri və ekspertlərlə
yanaşı, Avropa İttifaqının Xarici Fəaliyyət Xidmətinin,
Tədqiqat və İnkişaf Baş Direktorluğunun nümayəndələri,
Aİ-nin Bakı nümayəndəliyinin rəhbəri Roland Kobiya və
digər ekspertlər iştirak edirdilər. Qeyd edək ki,
Azərbaycan Respublikası və Avropa İttifaqı arasında
mövcud əməkdaşlığın daha da genişləndirilməsi məqsədilə
2009-cu ildə Avropa İttifaqı - Azərbaycan Əməkdaşlıq
Komitəsi çərçivəsində yaradılmış məşgulluq və sosial
məsələlər, ictimai səhiyyə, təlim, təhsil və gənclər,
mədəniyyət, informasiya cəmiyyəti və audiovizual siyasət,
elm və texnologiya məsələləri üzrə alt-komitənin təsis
edilməsi barədə qərar qəbul edilmiş və Təhsil Nazirliyi
alt-komitənin həmsədri, Xarici İşlər Nazirliyi isə Daimi
katibi təyin edilmişdir. Alt-komitənin həmsədri olaraq
Təhsil Nazirliyi Bakıda keçirilən iclasların təşkilati
işlərini həyata keçirir.
Tədbiri giriş sözü ilə açan təhsil nazirinin müavini
Qulu Novruzov bildirdi ki, Avropa İttifaqı ilə
Azərbaycan arasında kifayət qədər geniş və çoxsahəli
əməkdaşlıq mövcuddur. Bu əməkdaşlığı daha səmərəli etmək
üçün Xarici İşlər Nazirliyinin vasitəsilə müxtəlif
sahələr üzrə alt-komitələr yaradılmışdır. Alt-komitənin
tərkibinə Təhsil Nazirliyi də daxil olmaqla ümumilikdə
15 dövlət qurumu daxildir. Sosial məsələlər, təhsil,
ictimai səhiyyə və digər məsələlərdə əməkdaşlığa təkan
vermək məqsədilə yaradılan alt-komitənin qarşısında
duran əsas vəzifələr Aİ ilə ikitərəfli əməkdaşlığa töhfə
vermək və adıçəkilən məsələlərdə konkret nəticələrə nail
olmaqdır. Nazir müavini Q.Novruzov qeyd etdi ki,
müzakirə olunan məsələlər Azərbaycan ilə Avropa İttifaqı
arasında əməkdaşlıq üçün yaxşı perspektivlərin üzə
çıxmasına və daha böyük nəticələr əldə edilməsinə təkan
verəcək.
Xarici işlər nazirinin müavini Mahmud Məmmədquliyev,
Avropa İttifaqının Avropa Xarici Fəaliyyət Xidmətinin
nümayəndəsi Con Kiaer, Avropa İttifaqının Azərbaycandakı
nümayəndəliyinin rəhbəri Roland Kobiya və digər çıxış
edənlər müzakirələrin böyük əhəmiyyət kəsb edəcəyini və
ikitərəfli münasibətlərin inkişafına müsbət təsir
göstərəcəyini bildirdilər. İclasda qeyd olunan
məsələlərlə bağlı müzakirələr aparıldı.
İclas fevralın 10-da öz işini başa çatdıracaq.
Niyazi RƏHİMOV |