Azərbaycanın
birinci xanımı, YUNESKO-nun və İSESKO-nun xoşməramlı
səfiri, Milli Məclisin deputatı, Heydər Əliyev Fondunun
prezidenti Mehriban xanım Əliyevaya "İ.M.Seçenov adına
Birinci Moskva Dövlət Tibb Universitetinin Fəxri
professoru" Diplomu və Xatirə nişanı təqdim edilmişdir.
Təntənəli təqdimat mərasimi Azərbaycanın birinci
xanımının məzunu olduğu MDTU-da yerləşən Tibb Tarixi
Muzeyinin binasında keçirilmişdir. Əvvəlcə o, Tibb
Tarixi Muzeyi ilə, buradakı eksponatlarla, o cümlədən
səhiyyənin tarixi ilə bağlı qədim əşyalarla tanış
olmuşdur.
MDTU-nun rektoru, Rusiya Tibb Elmləri Akademiyasının
müxbir üzvü, professor Pyotr Qlıboçko ali məktəbin
kollektivi adından ali qonağı salamlayaraq qeyd etmişdir
ki, öz çoxsahəli fəaliyyətində Heydər Əliyev Fondu
səhiyyə sahəsinə çox böyük diqqət yetirir. Universiteti
1988-ci ildə əla qiymətlərlə bitirmiş Mehriban xanım
Əliyeva ali məktəbin fəxridir və çox sevindirici haldır
ki, o, bu gün də doğma elm ocağını unutmur,
universitetlə əlaqə saxlayır, onun problemlərinə böyük
diqqətlə yanaşır. P.Qlıboçko xüsusilə vurğulamışdır ki,
Elmi Şuranın yekdil qərarı ilə Mehriban xanım Əliyevaya
Fəxri professor adı verilmişdir.
Sonra MDTU-nun prorektoru Pyotr Litvitski elmi adın
verilməsi haqqında rəsmi sənədi oxumuş və Mehriban xanım
Əliyevanın müxtəlif beynəlxalq ictimai təşkilatlar
tərəfindən layiqincə qiymətləndirilən çoxtərəfli
fəaliyyətindən danışmışdır.
MDTU-nun rektoru Pyotr Qlıboçko Azərbaycanın birinci
xanımına "İ.M.Seçenov adına Birinci Moskva Dövlət Tibb
Universitetinin Fəxri professoru" diplomunu, Xatirə
nişanını və professor mantiyasını təqdim etmişdir.
Mehriban xanım Əliyeva ona yüksək Fəxri professor adının
verilməsinə görə ali məktəbin rəhbərliyinə, onun bütün
professor-müəllim və elmi heyətinə dərin minnətdarlığını
bildirmişdir. O demişdir: "Bu gün mən çox şadam ki,
təkcə gənclik və tələbəlik illəri ilə deyil, həm də yeni
dünyanın, yeni bilik aləminin açılması ilə, intellektual
potensialın toplanması ilə yadda qalan öz ali
məktəbimizdəyəm. Bu gün çox şey dəyişmişdir, dəyişməz
qalan təkcə bir şeydir: bu ali məktəbin yüksək
maarifçilik ruhu".
M.Əliyeva çıxışında Heydər Əliyev Fondunun sosial və
humanitar sahələri, təhsil və səhiyyə sahələrini əhatə
edən fəaliyyətindən və onun əhəmiyyətindən ətraflı
danışmışdır. Fond mövcud olduğu illər ərzində səhiyyə
sahəsində çox böyük iş görmüş, talassemiyaya, diabetə və
digər uşaq xəstəliklərinə qarşı mübarizəyə, uşaqlar
arasında ölüm hallarının sayının azaldılmasına və
bütövlükdə Azərbaycanda səhiyyə sisteminin inkişafına
yönəldilmiş bir sıra iri layihələr həyata keçirmişdir.
M.Əliyeva həmçinin tədbirin iştirakçılarına uşaq tərbiyə
müəssisələrinin, məktəblərin tikintisinə, ümumən təhsil
layihələrinə Fondun töhfəsi barədə məlumat vermişdir. O
xüsusi qeyd etmişdir ki, son illər Azərbaycanda və onun
bölgələrində minlərlə məktəb, habelə tibb müəssisələri
və digər sosial obyektlər tikilib istifadəyə verilmişdir.
Mehriban xanım Əliyeva keçən il dövlət müstəqilliyinin
20 illiyini qeyd etmiş müasir Azərbaycanın
müvəffəqiyyətlərindən, bütün sahələrdə ölkənin sürətli
inkişafından ətraflı söhbət açmışdır.
Mehriban xanım Əliyeva bildirmişdir ki, bu gün ona "Birliyin
ulduzları" dövlətlərarası mükafatı təqdim edilmişdir və
o, bu mükafatın pul hissəsini İ.M.Seçenov adına Birinci
Moskva Dövlət Tibb Universitetinə köçürməyi qərara
almışdır.
Sonda Mehriban xanım Əliyeva fəaliyyətinə verilən yüksək
qiymətə görə bir daha minnətdarlığını bildirmiş və
görüşün bütün iştirakçılarını Azərbaycana dəvət
etmişdir.
AzərTAc |