İyulun
13-də Təhsil Nazirliyində tam orta təhsilin təmayüllər
üzrə təşkil olunduğu pilot müəssisələrində aparılan
eksperimentin nəticələri ilə bağlı tədbir keçirildi.
Tədbirdə Təhsil Nazirliyinin məsul işçiləri, şöbə
müdirləri, eksperimentin aparıldığı təhsil
müəssisələrinin rəhbərləri və başqaları iştirak
edirdilər.
Təhsil naziri Misir Mərdanov tədbir iştirakçılarını
salamlayaraq "Tam orta təhsilin təmayüllər üzrə təşkil
olunduğu pilot müəssisələrində aparılan eksperimentin
nəticələri haqqında" təqdimatla çıxış etdi.
Təqdimatda öncə eksperimentin aparılmasının hüquqi
əsasları və keçirilməsini zəruri edən əsas səbəblər
haqqında məlumat verildi, eləcə də bu işdə qarşıya
qoyulmuş məqsəd diqqətə çatdırıldı. Qeyd olundu ki, bu
tədbirin həyata keçirilməsində əsas məqsəd tam orta
təhsilin təmayüllər üzrə səmərəli təşkili sahəsində
optimal istiqamətlərin müəyyənləşdirilməsi, təhsilin
təmayüllər üzrə təşkilinə ictimaiyyətin münasibətinin
öyrənilməsi və bunun əsasında müvafiq təkliflərin
hazırlanması, nümunəvi tədris planları və proqramların
sınaqdan keçirilməsi, təhsilin təmayüllər üzrə
təşkilinin repetitor xidmətlərinə təsiri vəziyyətinin
öyrənilməsidir.
Nazir bildirdi ki, eksperimentin aparılması üçün 6 pilot
müəssisəsi müəyyənləşdirilmişdir ki, bunlar akademik
Zərifə Əliyeva adına lisey, 6 nömrəli məktəb, Bakı
Avropa Liseyi, "Elitar" gimnaziya, Fizika-riyaziyyat və
informatika təmayüllü lisey və XXI əsr Beynəlxalq Təhsil
və İnnovasiya Mərkəzidir.
Eksperimentlə bağlı bir sıra təşkilati tədbirlərin
həyata keçirildiyini deyən təhsil naziri qeyd etdi ki,
eksperimentin tədris Azərbaycan və rus dillərində
aparılmaqla 4 təmayül üzrə (riyaziyyat-texniki,
riyaziyyat-iqtisadiyyat, humanitar fənlər, təbiət
fənləri) təşkili məqsədəuyğun sayılmışdır.
Təqdimatda eksperimentlə bağlı rəy sorğularının və
müzakirələrin nəticələrinə görə pilot layihə barədə
mülahizələr diqqətə çatdırıldı.
Növbəti slaydlarda 2010-2011-ci dərs ilində
eksperimentin aparıldığı 6 təhsil müəssisəsinin IX
sinfini Azərbaycan və rus bölmələri üzrə bitirən
şagirdlərin ümumi sayı, onlardan ayrı-ayrı təmayüllər
üzrə pilot siniflərə qəbul olunanların sayı haqqında
statistik göstəricilər nümayiş etdirildi.
Təhsil naziri təqdimatda daha sonra eksperimentin
aparıldığı ümumtəhsil məktəblərində ayrı-ayrı təmayüllər
üzrə təlim nailiyyətlərinin monitorinqinin nəticələri
ilə bağlı ətraflı məlumat verdi.
Tədris planlarının 2011-2012-ci dərs ilində tətbiq və
2012-2013-cü dərs ili üçün təklif olunan variantı,
eləcə də rəy sorğularının nəticələrinə görə digər
təkliflər tədbir iştirakçılarının diqqətinə çatdırıldı.
Tədbirin sonunda məsələ ilə bağlı müzakirələr aparıldı.
Hicran ƏKBƏROVA |