Azərbaycan
Respublikasının təhsil naziri Misir Mərdanov tədbiri
açaraq iştirakçıları salamladı. Nazir Azərbaycan Tibb
Universitetinin rektoru, akademik Əhliman Əmiraslanovu
65 yaşının tamam olması və Bakı Dövlət Universitetinin
rektoru, akademik Abel Məhərrəmovu İSESKO-nun mükafatına
layiq görülməsi münasibətilə təbrik edərək onlara şəxsi
həyatlarında və gələcək elmi fəaliyyətlərində böyük
uğurlar arzuladı.
Başa çatmaqda olan təqvim ilinin Azərbaycan üçün çox
uğurlu olduğunu vurğulayan nazir giriş sözündə bu il
ölkəmizdə elm və təhsil sahəsində həyata keçirilən çox
əhəmiyyətli beynəlxalq layihələrdən söz açdı. Belə
əhəmiyyətli tədbirlərdən biri olan İkinci Bakı
Beynəlxalq Humanitar Forumunda ali təhsil
müəssisələrimizin yüksək səviyyədə iştirak etdiyini
deyən nazir ölkə başçısı cənab İlham Əliyevin onların bu
mötəbər tədbirdəki fəaliyyətindən çox məmnun qaldığını
vurğuladı.
Sonra təhsil naziri ali təhsil sahəsi ilə bağlı
təqdimatı tədbir istirakçılarının diqqətinə çatdırdı.
Təqdimatda öncə son illərdə bu sahədə görülmüş işlərdən
bəhs olundu. Qeyd edildi ki, ali təhsil müəssisələrinin
maddi-texniki bazası əsaslı şəkildə yeniləşdirilmiş,
yeni kampuslar yaradılmış, ali təhsil müəssisələrinin
akkreditasiyası mexanizmi daha da təkmilləşdirilmiş,
2010-2012-ci illərdə 20 universitet akkreditasiyadan
keçmiş, tədrisin kredit sistemi ilə təşkili
istiqamətində mühüm işlər görülmüş, "Azərbaycan
Respublikasının Milli İxtisas Dərəcələri Çərçivəsi"
hazırlanaraq təsdiq üçün hökumətə təqdim edilmişdir. Ali
təhsilin səviyyələri üzrə (bakalavriat, magistratura), o
cümlədən rezidentura həkim-mütəxəssis hazırlığını təmin
edən yeni ixtisas siyahısı təsdiq olunmuş və tətbiq
edilmişdir. Ali təhsilin standartı, bakalavriat və
magistratura səviyyələri üzrə təhsilin məzmununa verilən
tələblər və təhsilin təşkili qaydaları təsdiq edilmiş,
buna müvafiq olaraq təhsil proqramları (kurikulumlar)
hazırlanmışdır və s.
Növbəti slaydlarda ali təhsildə yeni maliyyələşmə
mexanizminin tətbiqinin əsas məqsədləri, bu sahədə əldə
edilmiş nailiyyətlər, Nazirlər Kabinetinin bununla bağlı
qərarlarının icrası istiqamətində atılan addımlar və
qarşıya çıxan çətinliklər haqqında ətraflı məlumat
verildi.
Misir Mərdanov ayrı-ayrı ixtisaslar üzrə dövlət sifarişi
ilə ali təhsil müəssisələrinin bakalavriat və
magistratura səviyyələrində hər bir təhsilalana düşən
təhsil xərclərinin yeni təsdiq olunmuş və əvvəlki
miqdarı barədə məlumatı müşavirə iştirakçılarının
diqqətinə çatdırdı.
Sonra dövlət ali təhsil müəssisələrinə ödənişli
əsaslarla qəbulun tənzimlənməsi, ali təhsilin məzmununun
və müəllim hazırlığının təkmilləşdirilməsi,
professor-müəllim heyətinin peşəkarlığının artırılması
ilə əlaqədar məsələlərdən bəhs olundu. Ali məktəblərdə
təhsilalanların yekun attestasiyası haqqında fikrini
bildirən nazir qeyd etdi ki, dünyanın aparıcı
universitetlərinə qəbul olunan tələbələrin təxminən 60
faizi təhsil müəssisəsini müvəffəqiyyətlə bitirir, qalan
40 faizi isə müvafiq kompetensiyalara yiyələnmədiyi üçün
təhsil sənədi ala bilmir. Ölkəmizdə də keyfiyyətli və
rəqabətqabiliyyətli mütəxəssis hazırlığını təmin etmək
məqsədilə ali təhsil müəssisələrində məzunların
buraxılışının ciddi nəzarətə götürülməsi ən mühüm
vəzifələrdəndir. Bununla əlaqədar ali təhsil
müəssisələrində təhsilalanların attestasiyası, xüsusilə
yekun attestasiyası qaydaları təkmilləşdirilməli, dövlət
standartlarına uyğun təhsilalanların kompetensiyalarını
qiymətləndirməyə imkan verən yeni mexanizmlər
hazırlanmalıdır.
Təhsil naziri təqdimatında daha sonra Avropa İttifaqı
ilə əməkdaşlıq istiqamətində görülmüş işlərdən söz açdı.
Qeyd olundu ki, 1995-2012-ci illərdə Azərbaycan
universitetləri bu qurumun 32 TEMPUS layihəsinin
iştirakçısı, 2012-ci ildə 5 layihənin qalibi olmuşdur.
2007-2012-ci illərdə universitetlərimiz Aİ-nin 11
Erasmus-Mundus layihəsinin qalibi olmuşdur. Cari ildə bu
proqram çərçivəsində 8 layihə qazanılmışdır.
2009-2012-ci illərdə Təhsil Nazirliyi tərəfindən Avropa
İttifaqına 10-dan artıq TAİEX və tvinninq layihəsi
təqdim olunmuş, 2 tvinninq və 4 TAİEX layihəsi
qazanılmışdır. Avropa İttifaqı ilə əməkdaşlıq sahəsində
əldə olunmuş nailiyyətlər haqqında ətraflı məlumat verən
nazir perspektivdə nəzərdə tutulan tədbirləri
iştirakçıların diqqətinə çatdırdı.
Təhsil nazirinin təqdimatından sonra geniş müzakirələr
aparıldı. Müzakirələrdə ATU-nun rektoru, akademik
Əhliman Əmiraslanov, ADU-nun rektoru, professor Səməd
Seyidov, BSU-nun rektoru, professor Kamal Abdullayev,
AMİ-nin rektoru, professor Aqiyə Naxçıvanlı, AMİU-nun
rektoru, professor Gülçöhrə Məmmədova, AzTU-nun rektoru,
professor Havar Məmmədov, BDU-nun rektoru, akademik Abel
Məhərrəmov və digərləri ali təhsillə bağlı bir sıra
məsələlərə toxunaraq fikirlərini bildirdilər və
təkliflərini verdilər.
Sonda ali təhsil sahəsində həlli vacib olan müəyyən
məsələlərin müvafiq qurumların nümayəndələrinin iştirakı
ilə yenidən müzakirə olunması qərara alındı.
Hicran ƏKBƏROVA |