"Dilimiz
çox zəngin və ahəngdar dildir, dərin köklərə
malikdir". Ulu öndər Heydər Əliyevin səsləndirdiyi bu
fikirlər biz müəllimlərin hər gün rastlaşdığı tarixi
gerçəklikdir. Hər bir insan öz ana dilini yaxşı bilməli
və onu qorumalıdır. Ana dili insanın mənəvi aləminin
zənginləşməsində, dünyagörüşünün genişlənməsində,
mükəmməl təhsil almasında, öz soydaşları ilə ünsiyyət
qurmasında müstəsna rol oynayır. Fevralın 21-də
Sabunçu rayonu, Maştağa qəsəbəsindəki C.Nurməmmədov
adına 108 nömrəli tam orta məktəbdə Beynəlxalq Ana
Dili Günü münasibətilə geniş tədbir keçirildi.
Tədbir ümummilli lider Heydər Əliyevin öz səsi ilə
söylədiyi məşhur sözlərlə başladı: "Mən həmişə fəxr
etmişəm, bu gün də fəxr edirəm ki, mən
Azərbaycanlıyam!".
Əvvəlcə tədbirin aparıcıları bu günun tarixçəsi ilə
bağlı toplaşanlara məlumat verdilər.
Sonra Ş.İ.Xətai, S.Şirazi, N.Nərimanov və başqa
dahilərin dil haqqında söylədikləri fikirlər
məktəblilərin ifasında səsləndirildi.
V "b" sinif şagirdlərinin təqdim etdikləri kiçik
səhnəcikdə dilin insan bədəninin əsas orqanı olması
vurğulandı. Ürək, beyin, göz, qulaq gördüklərini,
eşitdiklərini, duyduqlarını məhz dil vasitəsilə
anlatdıqlarını ifadə etdilər. Məktəblilər fars,
fransız, ingilis, alman və rus dillərində də şeirləri
məharətlə söylədilər. Tədbirin maraqlı anlarından
biri də böyük istiqlal şairi Bəxtiyar Vahabzadənin
ana dili ilə bağlı fikirlərinin öz səsi ilə təqdim
olunması idi. XI sinif şagirdi, həm də tədbirin
aparıcısı Elmir Heydərovun söylədiyi xalq şairi
Məmməd Arazın "Ayağa dur, Azərbaycan" şeiri
gurultulu alqışlarla qarşılandı. Məktəbin istedadlı
şagirdlərinin ifasında dahi dramaturq
C.Məmmədquluzadənin məşhur "Anamın kitabı" əsərindən
bir parça səhnələşdirilərək öz ana dilinə ögey
münasibət bəsləyən, ana dilində danışmağı özünə ar
bilən bəzi nankor insanlar pislənildı.
Şagirdlərin söylədikləri "Türkün dili" (M.Şəhriyar),
"Ana dili" (B.Vahabzadə), "Ana dilimə dəymə"
(S.Rüstəm), "Öz ana dilini bilməyənlərə" (T.Bayram)
şeirləri, dil haqqında ifa etdikləri meyxana və
mahnılar tədbirə xüsusi rövnəq verdi.
Sonda məktəbin direktoru Narınc Mehdiyeva
qonaqlara, tədbiri hazırlayan müəllim və şagirdlərə,
tədbirin təşkilatçısı R.Hüseynova və dil-ədəbiyyat
müəllimi Natəvan Nəcəfovaya öz minnətdarlığını
bildirdi. Sabunçu rayonu Maştağa qəsəbəsindəki 128
nömrəli məktəbin direktoru Aida Aydəmirova kollektivi
bayram münasibətilə təbrik edib, onlara gələcək
fəaliyyətlərində uğurlar arzuladı.
Samirə DADAŞOVA,
Bakıdakı C.Nurməmmədov adına 108 nömrəli tam orta
məktəbin
Azərbaycan dili və ədəbiyyat müəllimi |