Naxçıvan Özəl Universitetinin III kurs tələbələrinin
pedaqoji təcrübəsinə həsr olunmuş yekun konfransı
keçirilmişdir.
Naxçıvan şəhərində yerləşən 8 nömrəli və Heydər Əliyev
adına orta məktəblərdə keçirilən konfransda
universitetin tədris və elmi işlər üzrə prorektoru,
tarix üzrə fəlsəfə doktoru, dosent İbrahim Kazımbəyli
çıxış edərək bildirmişdir ki, tələbələrin gələcəyin
savadlı, bilikli müəllimi, eləcə də mütəxəssis kimi
formalaşmasında pedaqoji təcrübənin rolu danılmazdır.
Məhz buna görədir ki, tələbələr təhsil müddətində
aldıqları bilikləri pedaqoji təcrübə zamanı sınaqdan
keçirirlər. Pedaqoji təcrübənin qrup rəhbərləri Nazim
Mahmudov, Anar Yaqubov, Abdulla Mustafayev bildirmişlər
ki, tələbələr təcrübə müddətində yeni metodlardan
istifadə etmiş, dərslərin əksəriyyətini İKT ilə
keçmişlər. Konfransda pedaqogika və psixologiya
kafedrasının müdiri, pedaqogika üzrə fəlsəfə doktoru
Solmaz Həsənli təhsilin strateji sahə olduğunu və bu
sahədə çalışan mütəxəssislərin yüksək hazırlığa sahib
olmalarının vacibliyini qeyd etmiş, bunun üçün də
ixtisasını, pedaqogika və psixologiyanı dərindən bilən
yaradıcı, düşünən, yüksək mənəvi dəyərlərə sahib
müəllimlər yetişdirilməsinin universitetin əsas
missiyası olduğunu diqqətə çatdırmışdır. Sonda bir neçə
tələbə təcrübə müddətində qazandıqları nailiyyətlərin
onların həyatında mühüm rol oynayacağını bildirmişlər.
Naxçıvan Özəl Universitetinin Mətbuat xidməti |