Javascript DHTML Drop Down Menu Powered by dhtml-menu-builder.com

ARXİV

12 İyul 2013 - №26

 

"Məktəbimizdə qələbəyə imza atan ilk şagird idim"

 

Müsahibimiz stend atıcılığı üzrə ikiqat olimpiya, altıqat dünya rekordçusu Zemfira Meftaxetdinovadır

Meftaxetdinova Zemfira Əliyevna 1963-cü il mayın 28-də Bakı şəhərində anadan olmuşdur. 

1976-cı ildən SSRİ-nin əməkdar məşqçisi Hafiz Cəfərovun rəhbərliyi altında stend atıcılığı ilə məşğul olmağa başlamışdır.

1984-cü ildə Azərbaycan Dövlət Bədən Tərbiyəsi Akademiyasını bitirmişdir.

"Dinamo" cəmiyyətinin sədr müavini vəzifəsində çalışır, polis polkovnik-leytenantıdır.

Azərbaycan Respublikası Prezidentinin sərəncamı ilə ikiqat olimpiya çempionu, altıqat dünya rekordçusu Zemfira Meftaxetdinova 2000-ci ildə "Şöhrət" ordeni, 1995-ci, 2004-cü illərdə isə ( iki dəfə)  "Tərəqqi" medalı ilə təltif olunmuşdur. 

Azərbaycan Respublikası Prezidentinin 10 oktyabr 2002-ci il tarixli sərəncamı ilə Xüsusi Olimpiya təqaüdünə layiq görülmüşdür.

Ailəlidir. Bir qız, bir oğul anasıdır.

 Uğurları onun baş tacıdır  

1986- cı ildən beynəlxalq dərəcəli idman ustası, 1996-cı ildən isə əməkdar idman ustasıdır.

1986-cı ildə İtaliyada keçirilən Avropa çempionatında komanda I yer, şəxsi II yer;Böyütmək üçün şəkili seçin

1987-ci ildə Türkiyədə keçirilən Avropa çempionatında komanda I yer, şəxsi III yer;

1988-ci ildə Finlandiyada keçirilən Avropa çempionatında komanda I yer, şəxsi II yer;

1990-cı ildə  İsveçdə keçirilən  Avropa çempionatında komanda I yer, şəxsi II yer;

1993-cü ildə Brnoda keçirilən Avropa çempionatında şəxsi I yer;

1995-ci ildə Kiprdə keçirilən  Dünya çempionatında şəxsi I yer;

1997-ci ildə Finlandiyada keçirilən Avropa çempionatında şəxsi I yer;

1998-ci ildə  İtaliyada keçirilən  Dünya Kubokunun qalibi;

1999-cu ildə Yaponiyada keçirilən  Dünya Kubokunda II yer.

2000-ci ildə Sidneydə keçirilən XXVII Yay Olimpiya Oyunlarında  stend atıcılığı üzrə Azərbaycanın yığma komandasına ilk qızıl medalı Zemfira Meftaxetdinova  qazandırmışdır. O, XXVII Yay Olimpiya Oyunlarında uğurla çıxış edərək Olimpiya çempionluğuna yüksəlmişdir.Böyütmək üçün şəkili seçin

2001-ci ildə Misirdə dünya çempionu adını qazanan Zemfira Əliyevna elə həmin il Seulda  dünya kubokunun  gümüş medalını da qazanmışdır.

2003-cü ildə Çexiyada  Avropa çempionluğuna  yüksəlmişdir.

2004-cü ildə Yunanıstanın Afina şəhərində keçirilmiş dünya kuboku uğrunda yarışlarda III yeri tutan idmançımız ardınca XXVIII Yay Olimpiya Oyunlarının bürünc mükafatını qazanmışdır.

2008-ci ildə Pekində keçirilən XXIX Yay Olimpiya Oyunlarının iştirakçısıdır. 

Zemfira xanımla  evinin yaxınlığındakı bağda görüşdük. Altı yaşlı oğlu Ruslanı da özü ilə gətirmişdi. İlk xahişi soyadını, atasının adını pasportunda göstərildiyi kimi yazmağım oldu. Yəni, Meftaxetdinova Zemfira Əliyevna.  

- İllərdir, hər zaman soyadımdakı hərfləri müxtəlif cür yazırlar. Doğrudur, soyadım bir az mürəkkəb səslənir. Bu ad babalarımdan bizə çatan addır. Nəinki bizdə, çox vaxt xarici mətbuatda da soyadımı düzgün yaza bilmirlər.

-  Tez-tez rast gəlinən ad deyil, yəqin ondandır.

- Ola bilər. Ata-anam Bakıda doğulsalar da, ulu nənə-babalarım aclıq illərində bir vaxtlar Volqa çayının sahillərindən - Ulyanovskdan Bakıya  köçüblər. Əslən tatar qızıyam, türk qollarından biri də bizim xalqdır.

Mən çox sadə bir ailədə böyümüşəm. Atam sürücüydü, anamsa layihə institutunda çalışırdı. Ailədə iki övlad idik: mən, bir də məndən dörd yaş yarım böyük olan qardaşım. Orta məktəb illərində qardaşım da, mən də idman dərnəklərinə gedirdik. Qardaşım gəmi mexaniki sənətinə yiyələndi,  hazırda "Xəzərdənizneft" Donanmasında məsləhətçi-mexanik işləyir. İdmanın yüngül atletika növü ilə indi də sadəcə bir həvəskar kimi məşğul olur.

Mən isə, bildiyiniz kimi, taleyimi idmana həsr etmişəm.

Əvvəllər evimiz indiki Mətbuat prospektində idi. Sonra köçdük 8-ci mikrorayona. Birinci sinifdən dördüncü sinfə qədər elə oradakı 225 nömrəli məktəbdə oxumuşam.  1980-ci ildə Bakı şəhərindəki  8-ci mikrorayonda yerləşən  115 nömrəli orta məktəbi bitirmişəm.

-  Ailə həyatınıza idmanın maneçiliyi olmur ki?

- Çalışıram ki, olmasın. 1989-cu ildə ailə quranda bizim toyumuzu aprelin 1-nə təyin etməyimizə heç kim inanmırdı, elə bilirdilər ki, bu bir zarafatdır. İlk övladım 5 fevral 1990-cı ildə dünyaya gəlmiş qızım Riginadır. O, hər zaman sakit, sözəbaxan olub. Amma Ruslan başqa cürdü, yerində dinc duran deyil. Əslində, oğlan uşaqlarının hamısı belədir.

Qızım  Bakı Dövlət Universitetinin beynəlxalq hüquq fakültəsini bitirib, hazırda polis orqanlarından birində çalışır. Həm də idmanla yaxından məşğul olur. Arabir  idman yarışlarına da qatılır.  Hazırda idman ustasıdır. Ruslan isə hələ məktəbə getmir.

Ruslanın atası da əvvəllər  idmanın cüdo növü ilə  məşğul olub. Amma onun əsas peşəsi idman deyildi. Bilirsinizmi, yoldaşımın atası, yəni qayınatam İsmət Əlizadə vaxtilə Zeynəb Xanlarovanın ansamblında çalışıb, elə böyük bir sənətkarı müşayiət edib...

-  Qızınız Rigina öz yolunu artıq müəyyənləşdirib. Bəs Ruslanı hansı sənətdə görməyi arzulayırsınız?

- Təbii ki, hər şeydən əvvəl yaxşı insan olmağını arzu edirəm. Yaxşı insan deyəndə  xeyirxah, sağlamfikirli, sağlamdüşüncəli bir insan olmağı nəzərdə tuturam. Belə keyfiyyətlərə malik olmağın  özü də böyük bir xoşbəxtlikdir. Bunlar bir ana kimi mənim  arzularımdır. Hansı peşəni, hansı sənəti seçmək isə Ruslanın öz ixtiyarındadır. Hansı sənət yolunu seçərsə, mən də, atası da sadəcə hər zaman onun yanında, ona dəstək olacağıq.

-  Orta məktəbdə oxuyarkən idmanla məşğul olmağınız əsas dərslərinizə vaxt ayırmaqda problem yaratmırdı ki?

- Hər zaman - şagird, tələbə olanda da, bir evin xanımı, iki uşaq anası olanda da çalışmışam ki, ailəmizin digər üzvlərinə öz işimlə, peşəmlə problem yaratmayım. Kamal attestatımda qiymətlərim yalnız "5" və "4" olub. Orta məktəb imtahanlarında həmişə ilk əvvəl məni və məsələn, Arzu adında  başqa bir qızı müəllim önə çağıraraq deyərdi: "Zemfira, Arzu, gəlin bilet götürün və hazırlaşmadan danışın". Çünki, müəllimlərimiz  hər zaman  mənim  hazırlıqlı olmağımdan əmin idilər. Məktəb illərində hər birimiz müxtəlif millətlərin nümayəndələri olan   dörd ayrılmaz rəfiqə idik. Dördümüz də idmana gedirdik. Biz sonralar da o dostluğu qoruyub saxladıq. Həmin qızlardan biri indi də rəhmətlik atamgilin,  yəni hazırda qardaşım yaşayan binada qonşumuzdur.

İllər ötdükcə hərənin öz  şəxsi  problemləri, öz məşğuliyyətləri meydana çıxdıqca yavaş-yavaş bir-birimizdən ayrı düşdük... Ancaq mən o illəri yenə də hər zaman xatırlayıram.

-  Necə oldu ki, məhz stend atıcılığını seçdiniz?

- Çox sadə. Çünki stend atıcılığı dərnəyi evimizin lap yaxınlığında idi, ona görə də biz dörd rəfiqə oraya yazıldıq. Amma sonralar idman mənim mənəvi ehtiyacıma çevrildi. Doqquzuncu sinifdə oxuyanda bütün normativləri yerinə yetirib idman ustası adına layiq görüldüm.

Direktorumuz idman ustası olmağım haqqındakı vəsiqəni bütün məktəb kollektivinin  iştirak etdiyi tədbirdə mənə təqdim etdi, məşqçimiz Hafiz  Cəfərov barəmdə xoş sözlər dedi və xüsusu geyim forması verdi. Məktəbimizdə qələbəyə imza atan ilk şagird idim deyə, bu, mənə böyük qürur hissi yaşatdı. Elə o gündən də mənim həyat yolum böyük idmana yönəldi. Hələ SSRİ zamanında - 1983-cü ildə Moskvada qızlar arasında keçirilən yarışda qalib oldum. Bu qələbəmi  gələcək uğurlarım üçün böyük tramplin hesab edirəm.

1986-cı ildə  Moskvada keçirilən Avropa kubokunda II yeri tutdum.

İlk dəfə Azərbaycan bayrağını qaldırmaq məşqçim Hafiz Cəfərova (Allahdan Hafiz müəllimə cansağlığı və şəfalar diləyirəm) və mənə respublikamız müstəqilliyini yenidən bərpa etdikdən sonra, 1993-cü ildə - Avropa çempionatının keçirildiyi Brnoda nəsib oldu.

1976-cı ildən, yəni 13  yaşımdan fasiləsiz olaraq bu günə kimi stend atıcılığı ilə məşğulam. Özümü idmandan başqa heç bir sahədə təsəvvür etmirəm. İdman artıq mənim həyatımdır, o, məni hər zaman özünə çəkir.

-  Sizdən soruşsaydılar ki, beynəlxalq aləmdə idmanın missiyası nədən ibarətdir, hansı cavabı verərdiniz?

- Deyərdim ki, idmanın mahiyyəti  "Dünyaya sülh" deməkdir.

Yeri gəlmişkən, sovet dönəmində bir atıcı qadın rəqibim vardı, özü Bakıda doğulan ermənilərdən idi, sonralar Rusiya komandasına keçmişdi, Moskvada yaşayırdı. Həmişə məndən xahiş edərdi ki, Bakıdan ona Azərbaycan musiqisi yazılan kasetlər aparım. Ürəyi gedirdi bizim musiqimiz üçün... ən çox da sevimli müğənnimiz Zeynəb xanımın səsinə qulaq asardı... Müharibə başlayandan sonra  qarşılaşmamışıq heç.

-  Zemfira xanım, 2015-ci ildə Avropa oyunlarının və 2020-ci ildə Yay Olimpiya Oyunlarının Azərbaycanda keçirilməsi ilə əlaqədar yaradılan təşkilat komissiyasının tərkibində siz də varsınız. Belə mötəbər oyunların məhz Bakıda keçirilməsinin mahiyyətini açıqlaya bilərsinizmi?

- Olimpiya oyunlarına ev sahibliyi etsək, həm ölkəmizin idman potensialının daha da gücləndirilməsinə, həm də Olimpiya dəyərlərinin gənclərimiz arasında daha geniş yayılmasına yardımçı olmuş olarıq. Azərbaycan gəncliyi bu oyunlar vasitəsi ilə Dünya Olimpiya Hərəkatının ən fəal iştirakçısına çevrilə bilər. Olimpiya Oyunlarının Azərbaycanda keçirilməsi Azərbaycan mədəniyyətini və qonaqpərvərliyini də dünya ictimaiyyətinə tanıdacaq, ölkələrimiz arasında yeni dostluq əlaqələrinin qurulmasına səbəb olacaq.

Ümumiyyətlə, dünyanın bir çox ölkələrində müxtəlif  kütləvi idman oyunlarının geniş yayılması  insanların sağlamlığına həm müsbət təsir edir, həm də onlara ruh yüksəkliyi gətirir.

-  Zemfira xanım, Azərbaycanda aparılan dövlət siyasəti içərisində əsas istiqamətlərdən biri də Azərbaycan idmanıdır. Hər bir idmançımızın uğuru nəinki  idmanımızın, həm də  bütövlükdə elə Azərbaycanımızın inkişafına bir təkandır. Siz idmançılar bayraqlarımızı göylərə ucaldan qələbələrinizlə həmişə xalqımızı sevindirirsiniz. Azərbaycanın başını ucaldan, bizə  sevinc  bəxş  edən  Azərbaycan idmançıları güvənc yerimizdir.

- Cənab Prezidentimiz İlham Əliyevin Azərbaycan idmanına göstərdiyi diqqəti, qayğısı, uzaqgörən siyasəti sayəsində bizim respublikamızın ən ucqar bölgələrində də olimpiya kompleksləri inşa etdirilmiş, orada yaşayan insanların, gənclərin, yeniyetmələrin istifadəsinə verilmişdir. Ona görə də mən bütün Azərbaycan idmançılarının adından deyirəm ki, biz idmançılar qazandığımız bütün uğurlar üçün ölkəmizin Prezidenti cənab İlham Əliyevə minnətdarıq.

İdmançılarımızın da uğurları göz qabağındadır. Təkcə 2005-2008-ci illərdə  idmançılarımız dünyanın müxtəlif  ölkələrində 1500-dən artıq medal qazanmış, bunların sırasında  500-dən çox iştirakçımız qızıl medala layiq görülmüşdür. Bu isə o deməkdir ki,  Azərbaycanın bayrağı dünyanın müxtəlif ölkələrində 1500 dəfə dalğalanmış, Azərbaycanın himni sərhədlərimizdən çox-çox uzaqlarda  1500 dəfə səsləndirilmişdir.

Əlbəttə, məhz ölkə rəhbərimizin  Azərbaycan idmanına göstərdiyi böyük diqqətin və qayğının  nəticəsidir ki, dünya idman federasiyalarının prezidentləri Azərbaycan ölkəsinə, Azərbaycan idmanına çox etimadla yanaşır, respublikamızda nəinki beynəlxalq yarışların, həmçinin olimpiya oyunlarına lisenziya verən yarışların da keçirilməsinə razılıq verirlər.

-  Zemfira xanım, həmişə əlinizdə silah olur. Məşqlərdə də, yarışlarda da. Yəqin ki, xidməti silahınız da var. Heç silahdan qorxduğunuz vaxtlar olubmu?

- Silah, ümumiyyətlə, təhlükəli bir şeydir. Onunla diqqətsiz və ya ehtiyatsız davranmaq olmaz. Əlində silah tutan hər bir şəxs onun məsuliyyətini də dərk etməli, bütün texniki təhlükəsizlik qaydalarına əməl etməlidir. Mən istəyərdim ki, heç bir silah Allahın yaratdığı heç bir canlıya tuşlanmasın.

-  İnsani xüsusiyyətlərdən  daha çox hansını qiymətləndirirsiniz?

- Yaxşılıq etməyi... İnsan kim olursa-olsun yaxşılıq etməyi bacarmalıdır. Mən də gücüm çatan qədərində hər zaman insanların köməyinə çatmağa çalışıram.

-  Ana kimi daha çox xoşbəxtsiniz, yoxsa qalib kimi?

- Ana olmaq Allahın nəsib etdiyi ən böyük xoşbəxtlikdir. Qalib gəlmək isə hər bir idmançının çəkdiyi zəhmətin nəticəsidir. Bunlar ayrı-ayrı şeylərdir. Qadının ilk vəzifəsi cəmiyyətə layiqli övlad böyütməkdir. Bu, bəşəri bir borcdur. İdman isə peşədir, burada söhbət artıq vətəndaş borcundan gedir.

-  Qarşıda duran vəzifələriniz nədən ibarətdir?

- 2015-ci ildə Azərbaycanda Avropa oyunları keçiriləcək. Bu böyük tədbirə ölkənin birinci xanımı Mehriban Əliyevanın rəhbərliyi ilə ciddi hazırlıq işləri aparılır.

2020-ci ildə isə respublikamızda Yay Olimpiya Oyunlarının keçirilməsi nəzərdə tutulur. Mən də təşkilat komissiyasının bir üzvü kimi üzərimə düşən vəzifənin məsuliyyətini dərk edirəm.

-  Azərbaycana ünvanlanan arzularınız?

- İlk növbədə torpaqlarımızın geri qaytarılmasını arzulayıram. Bu, hamımızın ən ümdə arzusudur. Cənab Prezidentimiz bu istiqamətdə var qüvvəsilə çalışır ki, tezliklə bu problem öz müsbət həllini tapsın.

Uşaqlar bizim sabahımızdır, gələcəyimizdir. Biz estafeti onlara verəcəyik. Odur ki, onlara açıq səma, sağlam həyat, sağlam orqanizm, sağlam şüur arzulayıram. Qoy bu dünyada heç bir körpənin gözü yaşlı qalmasın. 

"Azərbaycan müəllimi" qəzetinin oxucuları arasında gənclər də çoxdur. Mənim onlara tövsiyəm budur ki, idmanla hər zaman dost olsunlar, təhsilə ciddi yanaşsınlar. Təhsil səviyyəsi aşağı olan toplumun əziyyətini bütöv bir xalq çəkir. Hər bir şagird, hər bir tələbə bunu dərk etməlidir ki, o, valideyni üçün və ya təkcə özü üçün oxumur, onlar həm də tərəqqi yolunda millətimizin sabahına işıq saçacaq canlı ulduzlarımızdır.

Mən yeni təyin olunan təhsil nazirimizə də öz çətin və məsuliyyətli işində uğurlar diləyirəm.  

Hazırladı:  Ellada UMUDLU

 
 
 
Səhifənin başına qalx "Müsahibələr" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

DÜNYA ÖLKƏLƏRİNDƏ ALİ MƏKTƏBLƏRƏ QƏBUL

 
 
 

Copyright  ©  All Rights Reserved.
Created and supported by Mehman Shafagatov