Javascript DHTML Drop Down Menu Powered by dhtml-menu-builder.com

ARXİV

6 Sentyabr 2013 - №34

 

Afinada Ümumdünya Fəlsəfə Konqresi keçirilmişdir

 

Bu yaxınlarda Yunanıstanın paytaxtı Afinada 23-cü Ümumdünya Fəlsəfə Konqresi keçirilmişdir. Fəlsəfə üzrə fəlsəfə doktoru, əməkdar müəllim, Astara Pedaqoji Kollecinin direktoru, dosent Əlihəsən Həmzəyev konqresdə  iştirak edərək dünya filosofları qarşısında çıxış etmişdir.

Beynəlxalq konqresdən qayıdan Əlihəsən müəllimdən Afina səfəri haqqında fikirlərini bizimlə bölüşməyi xahiş etdik:

"Beynəlxalq Fəlsəfə Federasiyası tərəfindən hər beş ildən bir Ümumdünya Fəlsəfə Konqresi keçirilir. Bu il 23-cü dəfə keçirilən konqresə dünyanın müxtəlif ölkələrindən görkəmli filosoflar dəvət edilmişdi. Mən ikinci dəfədir ki, Afinada keçirilən mötəbər elmi konqresə dəvət olunmuşam. 2010-cu ildə keçirilən Ümumdünya Fəlsəfə Forumunda iştirak edərək orada elmi məruzə ilə çıxış etmişəm.

Avqustun 4-dən 10-na qədər davam edən konqresin açılış mərasimində dünya şöhrətli Afina orkestri konsert verdi. Konqres Afina şəhərində Zoqrafos Universitet şəhərciyində, Afina Milli Kapodistr Universitetinin Fəlsəfə Məktəbində keçirildi. Müəllifi olduğum "Qloballaşmanın innovasiyalar fonunda sosio-mədəni prosesinin şərhi" mövzusundakı elmi məqaləm konqresin "İnkişafın fəlsəfəsi" tematik bölməsində çıxış üçün qəbul olunmuşdu. Müasir dünyada müxtəlif səviyyəli və müxtəlif həcmli proseslər baş verir. Bu proseslərin arasında modernləşmə və qlobalizasiya ümumplanetar inkişafın əsas istiqamətləri kimi seçilir. Modernizasiya - ənənəvi cəmiyyətdən müasir cəmiyyətə keçid deməkdir. Qlobalizasiya modernizasiya tərəfindən yaradılır. Modernizasiya yox olduqda və ya dayandıqda qlobalizasiya da yox olur və yaxud dayanır. Məqalədə bu fikirlər və eləcə də qlobalizasiyanın sosio-mədəni şərhi innovasiya nöqteyi-nəzərindən daha da aydın şəkildə izah edilmişdir. Qeyd edim ki, konqresdə həmçinin Azərbaycanın görkəmli alimi, Azərbaycan Milli Elmlər Akademiyasının müxbir üzvü, fəlsəfə elmləri doktoru, professor Səlahəddin Xəlilov da iştirak edirdi.

Milli ornamentli xalçanı, Azərbaycan Respublikasının dövlət rəmzləri əks olunan və Qız qalasının təsviri olan xatirə qovluğunu konqresin Yunanıstan üzrə Təşkilat Komitəsinin prezidenti, professor Konstantinos Budurisə təqdim etdim. Çox maraqlı və yaddaqalan görüşlər oldu. Xeyli xarici alimlə həmsöhbət oldum. Hər söhbətimizdə onlara Qarabağ problemi və qarşıdan gələn prezident seçkiləri barədə geniş və əhatəli məlumatlar verdim. Əsas o fikir vurğulandı ki, Qarabağ əzəli Azərbaycan torpağıdır və ətraf rayonlarla  birgə azğın ermənilər tərəfindən  işğal olunub. Beynəlxalq aləm bu barədə öz qəti sözünü deməlidir".  

Azad ABDULLAYEV

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

DÜNYA ÖLKƏLƏRİNDƏ ALİ MƏKTƏBLƏRƏ QƏBUL

 
 
 

Copyright  ©  All Rights Reserved.
Created and supported by Mehman Shafagatov