|
Azərbaycan Respublikası Təhsil Nazirliyinin tabeliyində
olan 13 nömrəli İxtisaslaşdırılmış Olimpiya Ehtiyatları
Uşaq-Gənclər İdman Məktəbi uşaq və gənclərin idman
biliklərinə yiyələnməsində, onların peşəkar və
təcrübəli idmançılar kimi yetişməsində önəmli rol
oynayan təlim və tədris müəssisələrindən biridir.
Məktəbin yetirmələri ölkə, dünya və Avropa
birinciliklərində uğurla çıxış edir, Vətənimizi
layiqincə təmsil edərək üçrəngli bayrağımızı beynəlxalq
arenalarda zirvələrə qaldırırlar. Bu günlərdə idman
məktəbinin cüdo bölməsinin iki idmançısı Yunanıstanın
paytaxtı Afinada cüdo üzrə kadetlər arasında Avropa
birinciliyində iştirak edib.
13 nömrəli İxtisaslaşdırılmış Olimpiya Ehtiyatları
Uşaq-Gənclər İdman Məktəbinin direktoru Rüfət
Eyyubovdan aldığımız məlumata görə, 66 kq çəki
dərəcəsində mübarizə aparan Azərbaycan millisinin üzvü
Hidayət Heydərov qızıl medal qazanıb. O,
portuqaliyalı David Reisə, israilli Oran Ginerə,
gürcüstanlı Beka Udesianiyə və isveçrəli Naim Mattaya
qalib gələrək finala yüksəlib. Həlledici görüşdə Rusiya
cüdoçusu İsmayıl Çasiqovdan üstün olan təmsilçimiz
fəxri kürsünün ən yüksək pilləsinə qalxıb və Afinada
himnimizi səsləndirərək ölkəmizi layiqli təmsil edib.
Bundan başqa, idman məktəbinin digər yetirməsi qadın
cüdoçumuz Leyla Əliyeva da bu birincilikdə gümüş medala
layiq görülüb. Belə ki, 44 kq çəki dərəcəsində
mübarizəyə qoşulan L.Əliyeva finalda İtaliya təmsilçisi
Florini Michele ilə qarşılaşmada məğlub olaraq II yerlə
kifayətlənməli olub. |
