|
Bu günlərdə Quba rayonunda Azərbaycan Respublikası
Prezidenti yanında Gənclər Fondunun maliyyə dəstəyi ilə
"İntellektual çoxnövçülük üzrə Tələbə kuboku" turniri
keçirilib.
Layihənin rəhbəri Nizami Hüseynovun verdiyi məlumata
görə, tədbir "Yurd" Gənclərin İntellektual İnkişafına
Dəstək İctimai Birliyinin və Quba rayon Gənclər və İdman
İdarəsinin dəstəyi ilə reallaşdırılıb.
Tədbirdə respublikamızın müxtəlif ali təhsil
müəssisələrində təhsil alan 54 nəfər gənc intellekt 9
komandada mübarizə aparıb.
Yarış "Nə? Harada? Nə zaman?", "Xəmsə" və "Breyn-rinq"
üzrə keçirilib. Əsasnaməyə uyğun olaraq, yekunda ən çox
xal toplamış komandalar ilk üçlüyü bölüşüb.
"Nə? Harada? Nə zaman?" oyununda "Bakılı qızlar"
komandası 1-ci, "Hərum" 2-ci, "Şeşqoşa" komandası 3-cü
olub. "Xəmsə" turnirində isə "Hərum" intellektləri
fərqlənib. Bakı Dövlət Universitetinin komandası 2-ci,
Beyləqanın "Mil" komandası 3-cü yerdə qərarlaşıblar.
"Breyn-rinq" turnirində isə Bakı Dövlət Universitetinin
təmsilçiləri qalib adını qazanıblar. "Bakılı qızlar"
2-ci, "Mil" komandası 3-cü olub.
Tədbirin sonunda qalib və mükafatçılara kubok və
medallar, diplom və kitablar hədiyyə edilib. |
