Bakıdakı 91 nömrəli tam orta məktəbin idman
meydançasında Bakı Şəhər Gənclər və İdman Baş İdarəsi
tərəfindən Azərbaycan Respublikasının Milli Qəhrəmanı,
telejurnalist Çingiz Mustafayevin xatirəsinə həsr
olunmuş Səbail rayonu üzrə məhəllələrarası mini-futbol
turniri keçirilib. 1997- 2000-ci il və 2001-2004-cü il
təvəllüdlü idmançılar arasında keçirilən yarışda 14
komanda tərkibində 140 nəfər iştirak edib.
Hər iki qrup üzrə final oyunları gərgin mübarizə
şəraitində keçib. Belə ki, 17 yaşadək yeniyetmələr
arasında final oyununda "Bibiheybət" komandası "Neftçi"
komandasına 2 - 1, 13 yaşadək uşaqların final
qarşılaşmasında isə "Qəbələ" yığması "Bayıl"
təmsilçilərinə 3 - 1 hesabı ilə qalib gələrək I yerləri
tutublar.
Turnirin rəsmi bağlanış mərasimində iştirak edən Bakı
Şəhər Gənclər və İdman Baş İdarəsinin baş məsləhətçisi
Salman Əbdülov futbolun inkişafında uşaqlar arasında
keçirilən məhəllələrarası mini-futbol turnirinin böyük
rol oynadığını bildirib. Ölkə Prezidentinin müvafiq
sərəncamı ilə təsdiq olunmuş "Azərbaycan Respublikasında
2005-2015-ci illərdə futbolun inkişafına dair Dövlət
Proqramı"nın əhəmiyyətindən danışılıb. Torpaqlarımızın
azadlığı uğrunda şəhid olan Azərbaycan Respublikasının
Milli Qəhrəmanı, telejurnalist Çingiz Mustafayevin
vətənpərvərliyi və fədakarlığından söz açılıb.
Tədbirin sonunda qalib komandaların üzvləri Baş İdarə
tərəfindən müvafiq diplom, idman geyimi və kubokla
təltif olunublar.
Rəşad RAMAZANOĞLU,
"Azərbaycan müəllimi" |