Javascript DHTML Drop Down Menu Powered by dhtml-menu-builder.com

ARXİV

9 May 2015 - №16

 

Qələbədə babamızın da payı var

 

1941-1945-ci illər müharibəsinin iştirakçısı Barat Əsgərov haqqında nəvələri danışır 

Təkcə Azərbaycanda deyil, Avropada, MDB-yə üzv olan ölkələrin əksəriyyətində alman faşizmi üzərində qələbənin 70 illik yubileyi böyük təntənə ilə qeyd edilir.

Ötən əsrin 90-cı illərinə kimi SSRİ-nin tərkibində olan Azərbaycan Respublikasında yaşayan bütün əhali də müharibə başlayanda böyük Vətənimizin müdafiəsinə qalxmışdı. Həmin insanların içərisində qanlı-qadalı müharibə illərində böyük şücaətlər göstərmiş babamız Barat Əsgər oğlu Əsgərov da vardı. O qanlı-qadalı illərdə doğma yurd həsrəti, torpaq sevgisi, ümumi Vətənimizin müdafiəsinə qalxan hər kəsin düşmənlə mübarizəyə can atması qələbəni şərtləndirən amillərdən idi. Müharibə dövründə nəinki ön cəbhədə, hətta arxa cəbhədə də milyonlarla insan gecə-gündüz çalışıb faşizm üzərində qələbəyə öz töhfələrini verirdi.

Onların göstərdikləri misilsiz qəhrəmanlıqlar bügünkü gənclərimizə örnəkdir.

Biz babamızın müharibə haqqında danışdıqlarını o qədər də dəqiq xatırlamırıq. Lakin dayımız Telman Əsgərov hər dəfə babamızdan söz düşəndə  böyük fəxrlə atasından eşitdikləri epizodlardan, müharibədə əsgərlərimizin üzləşdikləri çətinliklərdən, onların rəşadətlərindən ağızdolusu danışır. Telman dayı danışdıqca həmişə kövrəlir, həmin günləri babamla birlikdə yaşayır.

O, qızı Aydanın səliqə ilə sandıqçada saxladığı babamızın şəkilləri olan albomu, təltiflərini, orden və medallarını qürurla bizə göstərir. Bunların arasında  I dərəcəli "Vətən müharibəsi ordeni", "Leninqradın qəhrəmancasına müdafiəsində iştirakına görə" medalı, "1941-1945-ci illərin Böyük Vətən Müharibəsində fədakar əməyinə görə" medalı, "Döyüş xidmətinə görə" medalı, "1941-1945-ci illərin Böyük Vətən Müharibəsində Almaniya üzərində qələbəyə görə" medalı və digər mükafatlar və təltiflər var.

Telman Əsgərovun dediklərindən:

- Sovet Azərbaycanı SSRİ-nin tərkibində olaraq hələ 1939-cu ilin payızından müharibəyə cəlb olunmuşdu. Həmin vaxt Azərbaycanın da igid oğul və qızları sovet-fin müharibəsi cəbhəsinə getmişdilər. Onların içində atam Barat Əsgərov da var idi. 1941-ci ilin iyununda atam Vətənə dönərkən yolda almanların SSRİ-yə hücum etməsi xəbərini eşidir və könüllü olaraq yenidən ön cəbhəyə qayıdır. O illərdə faşist qoşunlarına qarşı döyüşlərdə rəşadət göstərmiş, 193-cü diviziyanın 896-cı atıcı alayının əsgəri olan atam Barat Əsgərov Qafqazdan Berlinə kimi böyük və şərəfli döyüş yolu keçmişdir.  B.Əsgərov dəfələrlə ölümün pəncəsindən qurtulmuş, 2 dəfə ağır yaralanmış və müalicə olunduqdan sonra yenidən cəbhəyə qayıtmışdır. Atam tez-tez Böyük Vətən müharibəsi veteranı kimi yubiley tədbirlərinə dəvət olunurdu. Yaxşı yadımdadır, təhsil aldığım 62 nömrəli orta məktəbdə belə tədbirlərin birində atam növbəti dəfə müharibə ilə bağlı xatirələrini danışarkən - "əziz balalar, gördüyüm günləri heç birinizə arzulamıram, sakit və mavi səma altında atalı-analı (o, valideynlərini 1 yaşında itirmişdi) böyüyüb Vətənə dəyərli övlad olasınız", - dedi. Mənim üçün həmişə əzəmət və vüqar rəmzi olan atamın bu məqamda necə kövrəldiyini heç zaman unuda bilmirəm. Bir dəfə anamdan "atam həmişə müharibədən danışanda niyə kövrəlir", - deyə soruşanda o, "atan gördüyü faciələrin heç bir faizini belə dilinə gətirib danışa bilmir", - söylədi.

Torpağa, Vətənə bağlılıq məhz belə fədakar insanlardan keçib bizlərə. Bu gün torpaqlarımızın müdafiəsində ayıq-sayıq dayanan əsgərlərimiz də həmin od-alovun içindən mərdliklə, hünərlə çıxan igidlərin nəvələri, nəticələridir. Bizlər müharibə veteranlarını həmişə anmalı, xatırlamalıyıq. Gənclərimizə nümunə göstərməliyik. Doğma torpaqlarımızın müdafiəsinə qalxan hər bir əsgər bilməlidir ki, bu müqəddəs yolda zəhmət çəkən, canını belə fəda etməkdən çəkinməyən heç kəs yaddan çıxmır, heç kəs unudulmur.

Biz bacıların birgə təhsil aldığımız Bakı Dövlət Universitetində də qələbənin 70 illiyi münasibətlə bir sıra tədbirlər həyata keçirilir. Təbii ki, bu da gənclərdə vətənpərvərlik hissinin daha da artırılmasına, milli mənlik şüurunun formalaşmasına kömək edir.

Babamız sanki biz bacıların başına gələnləri öncədən duyub bu ifadələri işlətmişdi - "həyat çox qəribədir"... Biz onun rastlaşdığı faciələr ilə hələ dinc dövrdə üzləşdik. Uşaq ikən baba və nənəmizi, sonra valideynlərimizi itirdik. Yeniyetmə illərimiz isə Qarabağ müharibəsinə təsadüf etdi.

Biz əvvəllər də müharibə mövzusunda çəkilmiş filmlərə çox baxmış, haqqında yazılmış bədii əsərləri mütailə etmişdik. Müharibənin törətdiyi faciələrin, qiyabi olsa da, şahidi olmuşduq. Lakin heç vaxt ağlımıza gəlməzdi ki, əsl müharibənin nə olduğunu məhz gözlərimizlə görəcəyik. Biz döyüş bölgələrində yaşamasaq da, onun ağrısını, acısını yaxından duyduq.

Orta məktəbi bitirdikdən sonra tale bizi Ukraynanın Luqansk şəhərinə aparıb çıxardı. Üç il tələbəlik həyatını yaşadıq. Ölkədə siyasi durum gündən-günə gərginləşirdi və sonda bu hadisələr müharibə ilə nəticələndi.

Luqanskda qəfildən müharibənin başlanması təhsilimizi yarımçıq qoydu və təcili Bakıya qayıtmalı olduq. Son qərar artıq verilmişdi...

Qeyd etmək istəyirik ki, ulu Tanrı həmişə bizi xeirxah insanlarla qarşılaşdırıb. Bu illər ərzində daim dövlət qayğısını və ətrafımızda əzizlərimizin yoxluğunu bizə unutdurmağa çalışan insanların qayğısını hiss etmişik.

Ukraynadan qayıtdıqdan sonra  Prezident İlham Əliyevə, Heydər Əliyev Fondunun prezidenti Mehriban xanım Əliyevaya müraciətimiz cavabsız qalmadı. Biz artıq Bakı Dövlət Universitetinin tələbələriyik və ömrümüzün axırına kimi bu böyük xeyirxahlığı unutmayacağıq.

Telman dayım bizi tez-tez babamızın ziyarətinə aparır. Qələbə bayramı ərəfəsində onun ruhunu yad etmək bizim üçün böyük fəxr idi. Axı bu qələbənin qazanılmasında babamız Barat Əsgərovun da az da olsa əməyi var.

Biz də çalışmalıyıq, babamız kimi şərəfli və mükəmməl bir həyat yaşayaq. Və bir arzumuz da var. Tezliklə nigaran getdiyin Qarabağ torpaqları erməni qəsbkarlarından azad edilsin və bu qələbə münasibətilə ziyarətinə gələndə bayramın mübarək, Barat baba deyək.  

Fatmaxanım və Hilalə
DADAŞOVALAR,
BDU-nun tələbələri

 
 
 
Səhifənin başına qalx "Müsahibələr" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

700 BAL TOPLAYANLAR

 
 
 

Copyright  ©  All Rights Reserved.
Created and supported by Mehman Shafagatov