Javascript DHTML Drop Down Menu Powered by dhtml-menu-builder.com

ARXİV

20 İyun 2015 - №22

 

Almaniyalı mütəxəssislər "Naxçıvan" Universitetində olublar

 

Böyütmək üçün seçin"Naxçıvan" Universiteti respublikamızın bir çox ali məktəbləri ilə yanaşı, çoxsaylı xarici universitetlər və beynəlxalq qurumlarla da əməkdaşlıq müqavilələri imzalamışdır ki, bu əməkdaşlıqlar ortaq elmi proqramların və konfransların keçirilməsinə, tələbə mobilliyinin artırılmasına, müəllim, tələbə mübadilələrinin həyata keçirilməsinə yüksək təsir göstərmişdir. Hazırda universitetin Avropanın və eyni zamanda Türkiyənin bir sıra universitetləri ilə sıx əməkdaşlıq əlaqələri mövcuddur. "Naxçıvan" Universitetinin beynəlxalq əlaqələr şöbəsinin müdiri Gülşən Orucovanın rəhbərliyi ilə universitetlərarası əməkdaşlıq bir neçə istiqamət üzrə davam və inkişaf etdirilir. Belə ki, "Naxçıvan" Universitetində yenicə açılan alman dili ixtisası ilə əlaqədar Almaniyanın Münhen şəhərinin Lüdviq Maximilian Universitetinin 2 nümayəndəsi ali məktəbdə olub. Görüş zamanı ali təhsil ocağının rektor, professor İsmayıl Əliyev "Naxçıvan" Universitetinin keçdiyi inkişaf yolundan ətraflı danışıb. Rektor qonaqların diqqətinə çatdırıb ki, universitetin beynəlxalq əlaqələri bu ali məktəbdə təhsilin keyfiyyətinin yaxşılaşdırılmasına, onun struktur quruluşunun idarəetmə metodlarının, tədris proqramlarının məzmununun, texniki təchizatının və təhsil prosesinin beynəlxalq standartlara uyğun şəkildə qurulmasına və inkişafına yönəlmişdir.

Lüdviq Maximilian Universitetinin əməkdaşları Ferran Suner və Jorge Roche hər iki universitet arasındakı əməkdaşlıqdan, fakültələrarası imzalanacaq akademik mübadilə üzrə məsələlərdən, proqramın icrası üçün maliyyə məsələlərindən  danışıblar. Bundan başqa, ixtisasartırma kurslarında iştirak edəcək müəllimlər üçün LMU tərəfindən ediləcək güzəştlər və digər məsələlər də müzakirə edilib. 2015-2016-cı akademik il ərzində alman dili müəllimlərinin 1 il  müddətinə Münhenə ixtisasartırma kurslarına göndərilməsi nəzərdə tutulub. Həmçinin həmin müddət ərzində LMU-dan ixtisaslı kadrların 1 və ya 2 semestrlik "Naxçıvan" Universitetinə dəvət olunması, müxtəlif təlim kursları və workshopların keçirilməsi sahəsində də danışıqlar aparılıb.  Bu məsələlərlə əlaqədar universitetin tədris şöbəsi və xarici dillər kafedrasının heyəti ilə görüş olub. Onu da qeyd edək ki, LMU-nun əməkdaşları ali təhsil ocağında dil tədrisi sahəsində yeni metodların tətbiqi üzrə treninqlər də təşkil ediblər.

"Naxçıvan" Universitetində  yeni açılan alman dili ixtisasının proqram və tədrisinin təkmilləşdirilməsi üçün Alman Akademik Mübadilə Xidmətinin Azərbaycandakı təmsilçisi də "Naxçıvan" Universitetində olub.

DAAD-ın Bakı informasiya mərkəzinin direktoru Stefani Defaux çıxışında  Almaniya universitetlərindən olan akademik heyətin DAAD-ın təlimçilər üçün həyata keçirdiyi "Qısamüddətli təlim" proqramı vasitəsi ilə "Naxçıvan" Universitetində minumum 4 həftə, maksimum 6 ay ərzində dərs keçmələri üçün təşəbbüs göstərmələrini söyləyib, alman dili üzrə dərsliklər və digər dərs vəsaitləri ilə universitetin təmin olunmasına, eləcə də Almaniya səfirliyi ilə ikitərəfli əlaqələrin yaradılması və alman dili ixtisası üzrə səfirliyin dəstək olmasını irəli sürüb. 

Nuray CƏFƏROVA

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

700 BAL TOPLAYANLAR

 
 
 

Copyright  ©  All Rights Reserved.
Created and supported by Mehman Shafagatov