Javascript DHTML Drop Down Menu Powered by dhtml-menu-builder.com

ARXİV

20 İyun 2015 - №22

 

Xarici mətbuatdan

 

Eynşteynin məktubları 420 min dollara satılıb 

Dahi fizikin 27 məktubu hərraca çıxarılıb 

Dahi fizik, Nobel mükafatı laureatı Albert Eynşteynin məktubları Amerikadakı "Profiles in History" hərrac evində satılıb.  İlkin mərhələdə məktubların 500 min və 1 milyon dollar arasında alıcı tapacağı gözlənilirdi.  Hərraca fizikin 27 məktubu çıxarılıb.  Məktubların bəziləri onun öz əli ilə yazılıb. Məktublar 420 min dollara satılıb.  A.Eynşteynin 1945-ci ildə oğluna yazdığı məktublardan biri 62 min 500 dollara alınıb.  Məktubda nisbilik nəzəriyyəsi ilə  İkinci Dünya müharibəsi zamanı Yaponiyaya atılan atom bombası arasındakı əlaqədən bəhs edilirdi.  Alimin daha 2 məktubu 62 min dollara satılıb. Bu məktublarda A.Eynşteyn ateist olmadığını etiraf edir və təbiət qanunlarının bizim  dərk etməyimiz üçün çox mürəkkəb olduğunu düşündüyünü bildirir.

Qeyd edək ki,  alman fiziki A.Eynşteyn 1879-cu ildə anadan olub.  Nisbilik nəzəriyyəsinin banisi 1921-ci ildə nəzəri fizikaya töhfəsi və fotoelektrik təsir hadisəsini izah etməsinə görə  fizika sahəsində Nobel mükafatına layiq görülüb.


Almaniyalı qoca 102 yaşında doktorluq işini müdafiə edib 

O bu anı həsrətlə gözlədiyini deyib 

Almaniyada yaşayan 102 yaşlı İnqeborq Rappoport  77  il öncə yazdığı doktorluq işini müdafiə edə bilib. "Uçitelskaya qazeta"nın məlumatına əsasən,  İ.Rappoport  mətbuata açıqlamasında dünyada doktorluq dərəcəsi alan ən yaşlı qadın olduğunu bildirib. O,  difteriya  mövzusuna həsr etdiyi doktorluq işini 1938-ci ildə Hamburq Universitetində təhsil alarkən yazıb. Müharibə vaxtı 25 yaşlı İnqeborq  Hamburqdakı yəhudi xəstəxanasında həkim köməkçisi işləyib. Almaniyanın o vaxtkı Hitler rejimi İ.Rappoportun anası yəhudi olduğu üçün onun doktorluq işindən imtina edib. Lakin Hamburq Universiteti bu yaxınlarda İ.Rappoporta  ikinci  imkan yaradıb və o öz işini  ali məktəbin tibb fakültəsində uğurla müdafiə edə bilib. İ.Rappoport uzun illər Şərqi Berlindəki "Şarite" klinik korpusunda  professor  kimi çalışıb və çoxsaylı mükafatlara layiq görülüb.  Onun baş tutmayan doktorluq müdafiəsi haqqında ilk dəfə  universitetin dekanı xəbər  tutub və  ahıl qadına imtahan verməyi təklif edib. Nəticədə 77 ildən sonra İ.Rappoport imtahan verərək doktor elmi dərəcəsi alıb. İ.Rappoport doktorluq dərəcəsi almasına  görə çox sevinib və bu anı onilliklər boyu həsrətlə gözlədiyini bildirib.


Müəllimlərə hansı texnologiyalar lazımdır? 

Hazırda təhsil texnologiyaları  bazarı  milyon  dollarlarla  ölçülür. Lakin müəllimlər  bu vaxta qədər nəyə görə   məhz onlara lazım olan texnologiyaları ala bilmirlər? 

Bill və Melinda Geyt Fondunun (Bill Geyt ailəsi)  uzunillik tədqiqatları bu suala cavab tapmağa xidmət edir.  Fondun əməkdaşları son 2 il ərzində  bütün dünyada on minlərlə müəllim və məktəbli arasında sorğu aparıblar.  Layihənin  əsas məqsədi  ondadır ki, təhsil texnologiyalarını işləyib hazırlayanlar  bu işi görərkən öz intuisiyalarına deyil,  real  göstəricilərə əsaslanmalıdırlar. 

Tədqiqatın nəticələri düşünməyə əsas verir:  sorğuda iştirak edən müəllimlərin yarısı  etiraf ediblər ki, sinifdə tətbiq etdikləri rəqəmsal texnologiyalar ideal  təsəvvürlərdən  uzaqdır.  Bununla  belə, müəllimlər yenilikdən qorxmurlar. Onlar istəyirlər ki, təhsil texnologiyaları ənənəvi vasitələr kimi çox effektiv olsunlar.  Məktəblilər isə sorğu gedişində bildiriblər ki, texnologiyaların effektivliyi  onun yaratdığı  maraqdan fərqli olaraq  onlar üçün ikiqat  vacibdir. Fondun əməkdaşları  təhsil texnologiyalarını hazırlayanların xüsusilə diqqət yetirməli olduqları sahələri müəyyən ediblər- ibtidai məktəblər üçün ingilis dili, sosial elmlər, yuxarı siniflər üçün riyaziyyat. 


ABŞ-da əcnəbi tələbələr daha çox mühəndisliyi seçir 

Yeni rəqəmlər açıqlanıb 

Amerikada əcnəbi tələbələr arasında mühəndislik ixtisasına meyil güclənməkdədir. Əcnəbi tələbələr üçün  mühəndislik uğurlu karyera  vəd edir.  Aparılmış tədqiqatlara əsasən, Amerikada əcnəbilər arasında mühəndislik ixtisasının populyarlığı  son 4 il ərzində (2010-2014-cü illər) stabil və davamlı qalmaqda davam edib. Mühəndislik ixtisasında oxuyan tələbələrin sayı  ölkədəki  əcnəbi tələbələrin 18-19 faizini  təşkil edir.   Lakin tələbələrin oxuduqları  ərazilər  arasında bərabərsizlik mövcuddur. Təbiət elmləri,   mühəndislik, texnologiya və riyaziyyatı öyrənən tələbələr daha çox Kaliforniya, Nyu-York və Texasda cəmləşib.   Məlumata görə,  təhsillərini  başa vuraraq Amerikada əlavə praktika (Optional Practical Training - OPT) keçən əcnəbi tələbələrin 45 faizi işləmək üçün ölkə ərazisində qalır.  Təbiət elmləri,   mühəndislik, texnologiya və riyaziyyat  üzrə ixtisaslaşan əcnəbi tələbələr 17 aylıq OPT kurslarından yararlana bilərlər ki, bu da onların Amerikada işə düzəlmək şansını  artırır.

 

Oruc MUSTAFAYEV,
"Azərbaycan müəllimi"
xarici mətbuat materialları əsasında

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

700 BAL TOPLAYANLAR

 
 
 

Copyright  ©  All Rights Reserved.
Created and supported by Mehman Shafagatov