Naxçıvan
şəhərində yerləşən İlham Əliyev adına Olimpiya İdman
Kompleksində yeniyetmə və gənclər arasında boks üzrə
Naxçıvan şəhər açıq birinciliyi keçirilib.
AZƏRTAC xəbər verir ki, "Zərərli vərdişlərə yox deyək,
həmişə sağlam olaq" devizi altında keçirilən yarış
Naxçıvan Şəhər Gənclər və İdman İdarəsi və Naxçıvan
Muxtar Respublikası Boks Federasiyasının birgə
təşkilatçılığı ilə baş tutub. Turnirdə 16 çəki
dərəcəsində 40-a yaxın idmançı iştirak edib.
Yarışın keçirilməsinin məqsədi barədə danışan Naxçıvan
Şəhər Gənclər və İdman İdarəsinin rəisi Xəyal Qurbanov
bildirib ki, bu cür tədbirlər yeniyetmə və gənclərin
zərərli vərdişlərdən uzaqlaşmasına və sağlam ruhda
böyüməsinə kömək edir. O, muxtar respublikada idmanın
inkişafına xüsusi diqqət göstərildiyini vurğulayıb. Daha
sonra Naxçıvan Muxtar Respublikası Boks Federasiyasının
sədr müavini Məmmədcəfər Əliyev idmançılara yarışın
qaydaları haqqında məlumat verib və onlara uğurlar
arzulayıb.
Yarışda Naxçıvan şəhərinin komandası ilə yanaşı, Ordubad
və Kəngərli rayonlarının idmançıları da öz güclərini
sınayıblar. Elvin Seyidov (Ordubad), Nazim Abazərli
(Naxçıvan), Süleyman Abdullayev (Kəngərli), Ayxan
Quliyev (Naxçıvan) və başqaları müxtəlif çəki dərəcələri
üzrə qalib olublar.
Sonda qaliblərə Naxçıvan Şəhər Gənclər və İdman
İdarəsinin diplomları təqdim edilib. |