Təhsildə keyfiyyət müəllimdən başlayır, amma rəhbər də doğru seçilmiş şəxs olmalıdır. Bir çox pedaqoqlar belə hesab edirlər ki, direktor müəssisənin yol xəritəsini hazırlayan, əsas qərarverən olduğu qədər həm də müəllimin dəstəkçisi, məsləhətçisidir. 

“Pedaqoq olmayan məktəb direktoru yaxşı idarəedici də olmayacaq”

Azərbaycan Dövlət Pedaqoji Universitetinin kafedra müdiri, professor Fərrux Rüstəmov daha çox orta ümumtəhsil müəssisələrini nəzərdə tutaraq deyir ki, bu məktəblərin direktorları hər şeydən əvvəl pedaqoq olmalıdırlar:

“Məktəbdə Pedaqoji Şuranın sədri də direktor olur. Məktəb direktoru baş pedaqoqdur, ona görə də bu vəzifəyə birmənalı olaraq pedaqoqlar təyin edilməlidir. ABŞ-in təhsil modelinə görə, direktor pedaqoq olmaya bilər. Çünki orada direktor maliyyəçidir. Azərbaycanın təhsil sistemi isə direktordan pedaqoji bilik tələb edir. Məktəb direktoru şagirdin, müəllimin dərdini dinləməli, onları anlamalı, yol göstərməlidir. Direktor gözləməməlidir ki, müəllimlərə ehtiyac duyduqları pedaqoji dəstəyi yalnız onun müavinləri, yaxud metodistlər verməlidir. Pedaqoq olmayan məktəb direktoru yaxşı idarəedici də olmayacaq. Məktəbi inzibati qaydalarla idarə etmək mümkün deyil. Məktəb direktoru mütləq pedaqoqların arasından seçilməli, amma onun mütləq iqtisadi bilikləri, menecerlik bacarıqları da olmalıdır”.

“Peşə məktəbin rəhbərindən pedaqoji biliklə yanaşı, sahibkarlıq bacarığı da tələb edilir”

Maraqlıdır, görəsən, ali təhsil müəssisələrində bu keyfiyyətlərə cavab verən məktəb idarəediciləri hazırlanırmı?

Təhsilin idarəedilməsinə peşəkarların cəlbini vacib sayan İsmayıllı Dövlət Peşə Təhsil Mərkəzinin direktoru Cəlil Bağırov deyir ki, ADA Universitetində təhsilin idarə edilməsi, menecementi üzrə ixtisaslar tədris edilir: 

“Lakin həmin ixtisaslarda peşə təhsilinin idarəedilməsi məzmununa yer ayrılırmı? Çünki peşə təhsilindən əsas gözləntilərdən biri istehsalat təliminin emalatxanada simulyasiyasının idarəedilməsidir. Məncə, bu, çox önəmlidir. Ali və orta ixtisas təhsili müəssisisələrində mühazirə və seminarlar keçirir. Peşə təhsili müəssisələrində isə emalatxanalarda istehsal həyata keçirilir. İstehsalat prosesinin pedaqoji istiqaməti necə aparılmalıdır? Günəş panellərinin quraşdırıcısı, dərzi, dizayner ixtisaslarının istehsalat təlimi hansı texnologiyalarla daha müvəffəqiyyətli keçirilə bilər və istehsalat təliminin pedaqoji ssenarisi necə qurulmalıdır? Məncə, bu suallara aydınlıq gətirilməlidir”.

Cəlil Bağırov hesab edir ki, artıq müasir dövrdə bir peşə təhsili müəssisəsinin rəhbərindən pedaqoji biliklə yanaşı, sahibkarlıq bacarığı da tələb edilir: “Məncə, təhsilverənin sahibkarlıq düşüncəsi olarsa, peşə təhsili müəssisələrində dönüş yarana bilər”.

“Sahibkarlıq VÖEN açmaqdan ibarət deyil”

“Sahibkarlıq VÖEN açmaqdan ibarət deyil. Bu, iqtisadi prosesdir, ideyanın transformasiyasıdır”, - deyən C.Bağırov təhsil müəssisələrində auditoriyada müəllim və tələbə arasında əməkdaşlığın qurulması üçün münbit mühitin formalaşmasını vacib amillərdən hesab edir: 

“Bu əməkdaşlıq mühitini sahibkar düşüncəli insanlar qura bilərlər. Yeniləşən dünyada peşə təhsilinin məzmununu yaxşılaşdırmaq istəyiriksə, peşə təhsili müəssisələri üçün liderlər də hazırlamalıyıq, hansı ki, o liderlər pedaqoji bacarıqlara sahib olmalı, sahibkar kimi düşünməyi bacarmalı, regionda mümkün fürsətləri görə bilməli, müəssisəsinin sinerji potensialını üzə çıxarmalıdırlar. Çünki güclü təhsil müəssisələri yerləşdiyi regionun həyat tərzini müəyyənləşdirmə və ona müsbət təsir etmə gücünə malik olmalıdır”.