UNEC-də 5 ixtisas qrupu üzrə tələbə qəbulu

Azərbaycan Dövlət İqtisad Universitetində (UNEC) 2020/2021-ci tədris ilində 5 ixtisas qrupu üzrə tələbə qəbulu aparılacaq. Bu tədris ilində bakalavr pilləsi üzrə I və II ixtisas qruplarında yeni ixtisaslar açılıb.

 

Texniki və texnoloji ixtisaslar üzrə 3000 tələbə üçün nəzərdə tutulan, 12 ən müasir laboratoriya, auditoriya, mühazirə və linqafon otaqları, yeməkxana, idman zalı, kitabxana, konfrans zalları ilə təchiz edilən, modern memarlıq elementləri ilə zəngin kampus da yeni tədris ilindən istifadəyə veriləcək.

 

UNEC mətbuat üçün açıqlamasında ali məktəbin üstünlüklərini sadalayıb.

 

Bildirilib ki, universitetdə  tədris 4 dildə - Azərbaycan, türk, rus və ingilis dillərində aparılır. UNEC  600-dən yüksək bal toplayan abituriyent və beynəlxalq olimpiada qaliblərinə 100 manat məbləğində xüsusi təqaüd verir. Semestr ərzində imtahanlarda ən yüksək nəticə göstərən hər kurs üzrə 15 tələbə 100 manat məbləğində ikinci əlaçı təqaüdü qazanır.

 

Bundan başqa, Avropanın aparıcı universitetlərinin diplomuna UNEC-də sahib olmaq mümkündür. Tələbələr 4 il ərzində UNEC-lə yanaşı, Fransanın Montpelyer Universiteti, Paris şəhərində yerləşən Fransa və ABŞ-ın birgə təhsil müəssisəsi olan ICD Beynəlxalq Biznes Məktəbinin, London Universiteti/London İqtisadiyyat Məktəbinin diplomunu əldə edə bilirlər. Tələbələr “Erasmus+” və “Mövlana” beynəlxalq proqramları çərçivəsində Avropa və Türkiyənin nüfuzlu universitetlərində mübadilədə iştirak edirlər. UNEC tələbələri innovativ və operativ xidmət olan “Bir pəncərə” sistemi vasitəsilə lazım olan arayışları onlayn şəkildə əldə edirlər.

 

Qeyd olunub ki, UNEC-də tədris Amerika, Kanada və Qərbi Avropanın ən nüfuzlu universitetlərinin məzunları olan gənc müəllimlər tərəfindən aparılır. “Elektron Universitet” modeli vasitəsilə tələbələr mühazirə, dərs materialları, dərs cədvəli, imtahan balı, dərsə davamiyyət barədə məlumatları şəxsi elektron kabinetindən əldə edirlər. UNEC innovativ biznes inkubatoru tələbələrə kreativ ideyalarını şəxsi bizneslərinə çevirməyə dəstək olur. Ali məktəbdə fəaliyyət göstərən 24/7 kitabxana tələbələrə dərs və imtahanlara rahatlıqla hazırlaşmağa və dünyanın aparıcı universitetlərinin elektron kitabxana bazalarına daxil olmağa imkan verir. Bütün tədris binalarında oxu zalları və kitabxanalar yenilənərək tələbələrin istifadəsinə verilib. UNEC Yaradıcılıq Mərkəzi tələbələrə yaradıcılıq potensiallarını inkişaf etdirmək şansı yaradır.

 

 



01.06.2020 | 16:01