Pilot peşə proqramlarına tələbə qəbulunun müddəti iyulun 31-dək uzadılıb.

Bu barədə “Azərbaycan müəllimi” qəetinə Peşə Təhsili üzrə Dövlət Agentliyindən məlumat verilib.

Məlumatda qeyd edilib ki, Sənaye və İnnovasiyalar üzrə Bakı Dövlət Peşə Təhsil Mərkəzinin və Turizm və Sosial Xidmətlər üzrə Bakı Dövlət Peşə Təhsil Mərkəzinin pilot peşə təhsil proqramları üzrə təhsil almaq istəyən şəxslər Peşə Təhsili üzrə Dövlət Agentliyinin saytı vasitəsilə (https://bit.ly/3jyGWqB) iyulun 31-dək elektron qeydiyyatdan keçə biləcəklər.

Pilot peşə təhsil proqramları çərçivəsində Sənaye və İnnovasiyalar üzrə Bakı Dövlət Peşə Təhsil Mərkəzində “Avtomobil diaqnostikası və təmiri ustası “, “Veb dizayner və proqram təminatçısı“, “Torna və frezer dəzgahların operatoru”, “Sənayedə quraşdırma işləri üzrə usta”, “Elektronika ustası”, “Elektrik avadanlıqlarına xidmət və təmir üzrə elektrik montyoru”, “İnşaat ustası”, “Mebel ustası”, “Avtomatika üzrə usta” ixtisasları üzrə 1 illik texniki peşə, “Nəqliyyat vasitələrinin texniki istismarı” və “Kompüter sistemlərində proqram təminatçısı” ixtisasları üzrə isə yüksək texniki peşə, subbakalavr səviyyəsi, Turizm və Sosial Xidmətlər üzrə Bakı Dövlət Peşə Təhsil Mərkəzində isə “Aşpaz” və “Mehmanxana inzibatçısı” ixtisasları üzrə 1 illik texniki peşə təhsili pilləsinə yiyələnmək imkanı təklif olunur.
Xatırladaq ki, ətraflı məlumat Peşə Təhsili üzrə Dövlət Agentliyinin rəsmi səhifəsində (https://bit.ly/2ZVhbZD) öz əksini tapıb.

Ruhiyyə