BMU-da ilk dəfə ingilis dilində teledərslər

Yeni dərs ilindən Bakı Mühəndislik Universitetində (BMU) daha bir yeniliyə imza atılacaq. Azərbaycanın ali təhsil müəssisələri arasında ilk dəfə olaraq ingilis dilində teledərslərə start veriləcək.

 

Universitetdən bildirilib ki, BMU-da tədrisin 70 faizə yaxın ingilis dilində olması nəzərə alınaraq teledərslərin, əsasən bu dildə hazırlanması planlaşdırılıb. Bu isə teledərslərdən təkcə BMU-nun deyil, digər ali məktəblərin tələbələrinin də yararlanmasına imkan verəcək.

 

Teledərslər tələbələrin öz ixtisaslarını mənimsəmələri ilə yanaşı, onların dil bacarıqlarının təkmilləşdirilməsinə şərait yaradacaq. Digər tərəfdən, daha çox onlayn keçirilməsi çətinlik törədən xüsusi ixtisaslara, laboratoriya şəraitində öyrədilməsi zəruri olan fənnlərə üstünlük veriləcək və bu, tələbələrin praktik-təcrübi laboratoriya işlərini daha rahat izləməsinə imkan demək olacaq. Qeyd edilən dərslər universitetin televiziyasında (BMU TV), eyni zamanda sosial şəbəkə hesablarında yayımlanacaq.

 

Teledərslərin həftəlik cədvəli barədə əvvəlcədən məlumat veriləcək.

 

Onu da bildirək ki, yeni tədris ilindən tədrisə marağın azalmaması məqsədilə digər müvafiq layihələr həyata keçiriləcək. Bu tədbirlərdən biri kimi BMU Təhsil Nazirliyinin ali təhsil müəssisələri ilə birgə #HərZamanTəhsil həştəqi ilə start verdiyi yeni layihəyə qoşulur. Ölkənin ali təhsil ocaqlarında baş verən yenilikləri bir mənbədən izləmək və buradakı müzakirələrə qatılmaq üçün https://www.facebook.com/groups/ali.tehsil linkinə daxil olaraq feysbuk qrupuna qoşulmaq mümkündür.

 

 



14.09.2020 | 16:22