BMU-nun rektoru onlayn keçirilən imtahanları izləyib

Bakı Mühəndislik Universitetində (BMU) 2020/2021-ci tədris ilinin payız semestrinin qış imtahan sessiyası onlayn formada öz işinə başlayıb.

 

BMU-dan bildirilib ki, universitetin rektoru, professor Havar Məmmədov və ali məktəbin digər rəhbər şəxsləri imtahanların gedişatını izləyib.

 

Rektor COVID-19 pandemiyası ilə əlaqədar olaraq imtahanların distant formada elektron təhsil platforması üzərindən təşkil edildiyini bildirib və bunun üçün elektron universitet olan BMU-da bütün texniki imkanların yaradıldığını vurğulayıb.

 

H.Məmmədov  qış imtahan sessiyasının şəffaf və mövcud qaydalara uyğun keçirilməsi məqsədilə bütün tədbirlərin yüksək səviyyədə təşkil olunduğunu diqqətə çatdırıb. Tələbələrin biliyinin obyektiv və qərəzsiz qiymətləndiriləcəyinə əminliyini ifadə edən rektor imtahanda iştirak edən bütün tələbələrə uğurlar arzulayıb.

 

Qeyd edək ki, imtahan sessiyası başlanmazdan əvvəl imtahanların onlayn təşkili və nəzarəti, həmçinin iştirak prosesi ilə bağlı müvafiq işlər görülüb. Eyni zamanda, müəllimlər, inzibati işçilər və tələbələr üçün müvafiq video təlimatlar, metodiki tövsiyələr, vizual materiallar hazırlanıb və təlimlər təşkil olunub. Hal-hazırda da BMU-nun Distant Təhsil və Keyfiyyətin Təminatı mərkəzi tərəfindən tələbə və müəllimlərə sessiya müddətində operativ onlayn texniki dəstək xidməti göstərilir.   

 

Bu gün başlanan imtahan sessiyası 4 həftə davam edəcək. Sessiya dövründə universitet rəhbərliyi başda olmaqla, Distant Təhsil və Keyfiyyətin Təminatı mərkəzi tərəfindən imtahanlara mütəmadi onlayn nəzarət təşkil ediləcək.  

 



11.01.2021 | 17:02