Ümumdünya Səhiyyə Təşkilatının qənaətinə görə, avtonəqliyyat vasitələrinin yaratdığı səs-küy  problemi  insan orqanizmində çoxsaylı  sinir, mədə-bağırsaq, ürək-damar  xəstəlikləri, xroniki yorğunluq, diqqət və yaddaşın zəifləməsini yaradan, normal istirahət və orqanizmin müqavimət gücünü bərpa etməyə mane olan əsas amillərdən biridir. Bəzi ölkələrdə aparılan tədqiqatlara görə, bu səbəblərdən insan ömrünün  orta hesabla  10-12 il azaldığı məlum olub.  

Azərbaycan Milli Elmlər Akademiyası Coğrafiya İnstitutunun Ekocoğrafiya şöbəsinin əməkdaşları Sumqayıt  şəhərində avtonəqliyyat vasitələrinin yaratdığı səs-küyün intensivliyi, onun  insan sağlamlığına  təsir xüsusiyyətlərinə dair tədqiqat işləri aparırlar.

Tədqiqatlar zamanı şəhərin  daha intensiv III və IV dərəcəli küçələrinin, daha dəqiq desək, üç xarakterik hissəsinin 0,10 və 20 metr məsafəliyində nəqliyyatın gur  vaxtında müvafiq müşahidə məntəqələri seçilib. Səs-küyün  diapazonu üzərində  “SVAN 947” cihazı vasitəsi ilə ölçmələr  aparılıb,  orta rəqəmlər əldə  edilib.

Müşahidələr zamanı əldə edilən  yetmişdən artıq kartotekanın emalının nəticəsi kimi şəhərin bəzi, o cümlədən, Sülh, Bakı və Koroğlu küçələrinin müxtəlif məntəqələrinin “0” nöqtəsində səs-küy miqdarının normadan orta hesabla 10 dB artıq olması təyin edilib. 10 metrlik məsafə göstəriciləri isə Sülh küçəsinin bəzi məntəqələrində normadan orta hesabla cəmi 5 dB artıq olub.

İnsan sağlamlığının vacibliyi nəzərə alınaraq, institutun əməkdaşları tərəfindən problemin paytaxt Bakı daxil olmaqla, digər iri şəhərlərdə də araşdırılması  planlaşdırılır.

Bu barədə Coğrafiya İnstitutundan bildirilib.