“Laləli bağ” adlı rəsm sərgisi

Sumqayıt şəhərində “Sülh Plaza” otelində  “Laləli bağ” adlı tədbir keçirilib. Sumqayıt göz xəstəxanasının həkim endokrinoloqu  Aytən İsmayılova  sağlamlıq imkanları məhdud uşaqlara  kömək məqsədilə təşkil olunan bu rəsm sərgisi barədə iştirakçılara ətraflı məlumat  verib. Sərgidə 11 yaşlı Fatimənin nənəsi Lətifə Rəhimovanın  çəkdiyi rəsmlər nümayş  olunub.

 

Sərginin keçirilməsində əsas məqsəd   burada toplanan vəsaiti  fiziki və əqli qüsurlu uşaqlar üçün   internat evinə yardım kimi köçürmək olub.  Sərgidə nümayiş olunan rəsmlərin arasında  biri  diqqəti xüsusilə cəlb edib. Həmin  rəsmdə  erməni  qəsbkarların əsarətindən azad olunan  Qarabağımızın dilbər guşəsi olan Ağdamın Maqsudlu kəndinin təsviri  verilib. Rəsmdə  yeniyetmə qızın uzaqlara dikilən mənalı baxışları düşmənlər tərəfindən Xocalıda öldürülən günahsız fidan balaların, eləcə də Zəhranın ölümünün ağrısını sanki təzədən yaşadıb iştirakçılara.

 

Qonaqlara təqdim olunan başqa rəsmlərdə  də insanı düşünməyə vadar edən  maraqlı lövhələr  yer alıb. Gözəl havası, suyu,  bərəkətli  torpağı  olan Qarabağın təbiəti  də ustalıqla fırçaya alınıb. Rəssamlıq üzrə təhsil almasa da,  Lətifə Rəhimovanın rəsmlərində hiss və həyəcan, doğma yurda   vurğunluq kimi müqəddəs hisslər rənglərin dili ilə ustalıqla ifadə olunub. Kətan üzərində yağlı boyadan məharətlə istifadə edən müəllif rəsmlərinin hər birində 11 yaşlı nəvəsinin  müxtəlif rəng çalarlığında   təsvirini verib. Sərgi  iştirakçıları  həmin rəsmləri alaraq  öz evlərində  tarixi bir xatirə kimi saxlamağa qərar veriblər. Bu, həm də  xüsusi qayğıya ehtiyac olan uşaqlara diqqətin təzahürü kimi dəyərləndirilib.

 

Tədbirin sonunda Tərtər Rayon  Hərbi  Komissarlığının  baş həkimi Nadir Rəhimov ailəsi adından sağlamlıq imkanları məhdud  olan 11 yaşlı Fatiməyə  göstərilən qayğıya görə təşkilatçılara və bütün iştirakçılara  dərin  təşəkkürünü ifadə edib.

 

Sonda qonaqlar çay süfrəsi ətrafında Fatimə ilə xatirə şəkli  çəkdiriblər.

 

Sifai SƏFƏROVA

 

 

 



18.07.2021 | 12:19