Bakı Ali Neft Məktəbinin (BANM) məzunu Ələddin Mərdanov dünya üzrə müraciət etdiyi ali məktəblərdən 13-nün magistratura üzrə proqramlarına qəbul olunub. O, həmçinin həmin universitetlərin bir çoxundan təqaüd qazanıb.

Ali Məktəbdən bildirilib ki, Ə.Mərdanov Kimya mühəndisliyi, Material mühəndisliyi, Sənaye Enerji prosesləri və davamlılıq, İnnovativ və dayanıqlı Kimya mühəndisliyi, Ətraf-mühit mühəndisliyi və s. ixtisaslar  üzrə qəbul olunub. O, daha bir neçə ali məktəbin qəbul imtahanlarının test mərhələsini keçsə də, artıq bu cür yüksək nəticələrə görə həmin müraciətlər üzrə yekun müsahibələrdən imtina edib. Bu isə bakalavr məzunu üçün yüksək göstəricidir.

Ə.Mərdanov təhsilini Erasmus Mundus təqaüd proqramı ilə Kimya innovasiya və tənzimləmə ixtisası üzrə Bolonya Universiteti, Heriot-Vat Universiteti, Barcelona Universiteti və Algarve Universitetinin birgə tədris  proqramı üzrə həmin universitetlərin yerləşdiyi ölkələrdə davam etdirmək qərarı verib. O, 1000 müraciətçi arasından təqaüdə layiq görülmüş 25 nəfərdən biridir.

Xatırladaq ki, Ə.Mərdanov 2016-cı ildə Dövlət İmtahan Mərkəzi  tərəfindən keçirilmiş qəbul imtahanında 650 bal toplayaraq BANM-in Kimya mühəndisliyi ixtisasına dövlət sifarişi üzrə qəbul olunub.

BANM məzunu təhsil aldığı müddətdə BASF və “Carlsberg Azerbaijan” şirkətlərində təcrübə keçmiş yeganə tələbədir. Həmçinin 3 il professional tərcüməçi kimi fəaliyyət göstərib.