2022-ci ildə ölkə üzrə 8 şəhərdə ümumi olaraq 49 ümumtəhsil məktəbin ibtidai siniflərində “Sağlam təhsil–sağlam millət” layihəsinin tətbiqi nəzərdə tutulub. 

Hazırda layihə Sumqayıtda 1, Bakıda isə 39 olmaqla, ümumilikdə 40 məktəbin 211 ibtidai sinfində tətbiq edilir. Sözügedən siniflərdə təhsil alan ümumi şagird sayı isə 4350 nəfərdir.

Qeyd edək ki, təhsilalanların sağlamlığının qorunması və təlim nailiyyətlərinin yüksəldilməsi məqsədi ilə 2014-2015-ci ilin tədris ilindən etibarən “Sağlam təhsil-sağlam millət” layihəsinin tətbiqinə başlanılıb. Layihənin əsas vəzifələri proqressiv Azərbaycan vətəndaşı yetişdirmək, uşaq və yeniyetmələrin fiziki-psixi sağlamlığının qorunmasına xidmət edən sağlam təhsil texnologiyalarını işləyib hazırlamaq və tətbiq etmək, uşaq və yeniyetmələrdə milli mənəvi dəyərlərin formalaşdırılmasını təmin edəcək təlim mühitinin yaradılması işinə töhfə vermək, eyni zamanda tədris prosesinin şagirdlərin sağlamlığını zədələməməsinə yönəlik fəaliyyətlərin təşkilindən ibarətdir.