Türkiyənin Qazi Universiteti, Azərbaycan Texniki Universiteti (AzTU) və Mingəçevir Dövlət Universiteti (MDU) üçtərəfli işbirliyi çərçivəsində Beynəlxalq informasiya təhlükəsizliyi gününə həsr olunan “İnformasiya təhlükəsizliyi: təhlükələr və müdafiə mexanizmləri” mövzusunda elmi seminar keçirib. Üç gün müddətində davam edən seminarda tərəfdaş universitetlərin akademik və inzibati heyət üzvləri, tələbə, magistrant və doktorantları iştirak ediblər.

Elmi seminarın açılışında Qazi Universitetinin rektoru Musa Yıldız, AzTU-nun rektoru Vilayət Vəliyev və MDU-nun rektoru Şahin Bayramov çıxış ediblər.

Hər üç universitetin rektorları əməkdaşlığın uğurla davam etdirilməsindən məmnunluqlarını ifadə edib, yaradılan işbirliyi çərçivəsində qısa müddət ərzində atılan real addımlardan və əldə olunan nailiyyətlərdən danışıblar. İkitərəfli və üçtərəfli formatlarda əlaqələrin inkişaf etdirilməsi ilə bağlı fikirlərini bölüşən rektorlar seminarın əhəmiyyətini diqqətə çatdırıb, sözügedən elmi tədbirin təşkilində əməyi olanlara təşəkkürlərini bildirib və iştirakçılara uğurlar arzulayıblar.

Sonra MDU-da fəaliyyət göstərən Qazi Universitetinin professoru Ercan Nurcan Yılmazın moderatorluğu ilə elmi seminar birinci bölmədə məruzələrlə işinə davam edib. Qazi Universitetinin Elm İnstitutunun İnformasiya təhlükəsizliyi mühəndisliyi üzrə bölüm rəhbəri, dosent Murat Dener “Simsiz sensor şəbəkələrdə kibertəhlükəsizlik”, AzTU-nun Kompüter texnologiyaları və kibertəhlükəsizlik kafedrasının müəllimləri- Validə Məmmədova “ISO/IEC 27001 – İnformasiya təhlükəsizliyinin idarə edilməsi standartı”, Əfsanə Yusifzadə “İnternetdə informasiya təhlükəsizliyi problemləri”, MDU-nun İnformasiya texnologiyaları kafedrasının müəllimləri- Günel Baxşıyeva “İot cihazlarını təqib edən kibertəhlükələr” və Şəbnəm Nəsirova “Şəbəkələrdə informasiya təhlükəsizliyinin təmini” mövzularında çıxış ediblər.

MDU-da fəaliyyət göstərən Qazi Universitetinin professoru Cemal Yılmazın moderatorluğu ilə elmi seminarın ikinci bölməsi üzrə də məruzələr dinlənilib. Qazi Universitetinin Texnologiya fakültəsinin dosenti İbrahim Alper Doğru “Mobil təhlükəsizlik”, AzTU-nun Kompüter texnologiyaları və kibertəhlükəsizlik kafedrasının baş müəllimi Esmira Mustafayeva “İnformasiyanin gizli ötürülməsi kanalları və onların internet üzərindən reallaşdırılması imkanları”, MDU-nun İnformasiya texnologiyaları kafedrasının müəllimləri- Leyla İsmayılzadə “Ali təhsil müəssisəsində informasiya təhlükəsizliyinin bəzi aspektləri”, Validə Nuriyeva “Virtual mühitdə kiber hücumlardan qorunma üsulları” və Nərmin Əhmədova “Blokçeyn texnologiyalarında təhlükəsizlik nəzarətinin tədqiqi” mövzularında çıxış ediblər.

AzTU-nun professoru Vaqif Qasımovun moderatorluğu ilə keçirilən üçüncü bölmədəki çıxışlarla seminarın işinə yekun vurulub.