İyulun 22-də  Rusiya Federasiyası Həştərxan Dövlət Univer­sitetinin strateji inkişaf üzrə prorektoru, iqtisad elmləri namizədi Elina Polyanskaya, həmin universitetin Avrasiya və Şərq Departamentinin direktoru, siyasi elmlər doktoru professor Rafik Usmanov Bakı Slavyan Universitetində olublar.  Tədris işləri üzrə prorektor, professor Telman Cəfərov qonaqlara universitetin tarixi, keçdiyi inkişaf yolu, fakültələri və ixtisasları, universitetin beynəlxalq əlaqələri barədə ətraflı məlumat verib. O, BSU-nun Rusiyanın br çox universitetləri ilə sıx əlaqələrə malik olduğunu, universitetdə Moskva və Sankt-Peterburq Tədris-Mədəniyyət mərkəzlərinin fəaliyyət göstərdiyini bildirib. Rusiya Federasiyasının Prezidenti V.V.Putinin bu universitetin fəxri professoru olduğunu vurğulayan prorektor qonaqlara Türk-Slavyan Əlaqələri və Tərcümə Problemləri elmi-tədqiqat laboratoriyalarının işi barədə də məlumat verib. O, rus dilinin və rus ədəbiyyatının Azərbaycanda bu gün də xüsusi həvəslə öyrənildiyini və Bakı Slavyan Universitetinin bu işdə baza rolu oynadığını deyib.

Həştərxan Dövlət Universitetinin birinci prorektoru, iqtisad elmləri namizədi Elina Polyanskaya da universitetləri haqqında məlumat verərək bu il çalışdıqları  ali məktəbin 100 illiyinin qeyd ediləcəyini bildirib. O, Həştərxan vilayətinin, o cümlədən Həştərxan Dövlət Universitetinin bütün zamanlarda Azərbaycanla sıx əlaqələrə malik olduğunu qeyd edib. E.Polyanskaya hazırda universitetdə 200-ə qədər azərbaycanlı tələbənin təhsil aldığını diqqətə çatdırıb. Bundan əlavə o, HDU-nun Həştərxanda fəaliyyət göstərən Azərbaycan diasporu ilə yaxından əməkdaşlıq etdiyini, bir çox  layihələrə birgə imza atdıqlarını söyləyib. Universitetdə Azərbaycan dili və mədəniyyəti mərkəzinin təşkili üçün otaq ayrıldığını və bu işin Bakı Slavyan Universitetinin dəstəyi ilə həyata keçiriləcəyinə ümid etdiyini vurğulayan prorektor  Bakıda da Həştərxan Dövlət Universiteti mərkəzinin yaradılması ilə bağlı intensiv işlərin getdiyini bildirib.  

Daha sonra tərəflər gələcək əməkdaşlığın vacib istiqamətlərini müzakirə ediblər. Buraya tələbə mübadiləsinin reallaşdırılması, birgə elmi layihələrin həyata keçirilməsi, professor-müəllim heyətinin qarşılıqlı ezamiyyəti məsələləri, elmi jurnalların və nəşrlərin birgə nəşri və s. daxildir.

Qonaqlar daha sonra Rusiya Tədris-Mədəniyyət Mərkəzinə, Ukrayna Tədris-Mədəniyyət Mərkəzinə, Heydər Əliyev Tədris Mərkəzinə və Muzeyə baş çəkib, mərkəzlərin fəaliyyəti ilə tanış olublar. Sonda 2013-cü ildə imzalanmış universitetlərarası müqavilənin yenilənməsi qərara alınıb.

Bakı Slavyan Universiteinin prorektoru, professor Telman Cəfərov qonaqlara “Ümidləri doğruldan universitet” və “Ən yeni Azərbaycan ədəbiyyatı” antalogiyası kitablarını hədiyyə verib.