Azərbaycan Dövlət Neft və Sənaye Universitetinin (ADNSU) əməkdaşları Novruz bayramı münasibəti ilə 44 günlük Vətən müharibəsində şəhidlik zirvəsinə ucalan məzunların ailələrini ziyarət ediblər.

Bakı ilə yanaşı, Azərbaycanın müxtəlif bölgələrində - Qazax, Ağstafa, Şəki, Oğuz, Neftçala və digər rayonlarda şəhid ailələrini ziyarət edən nümayəndə heyəti universitetdə şəhidlərin xatirəsinin əbədiləşdirilməsi istiqamətində görülən işlərdən danışıb. ADNSU-da şəhid məzunların xatirəsinə həsr edilmiş abidənin tələbələrdə vətənpərvərlik hisslərinin aşılanmasında mühüm rol oynadığı qeyd olunub. Növbəti tədris ilinin əvvəlinədək ADNSU-nun şəhid olmuş məzunlarının adına auditoriyaların açılmasının planlaşdırıldığı da vurğulanıb. Bildirilib ki, universitet müntəzəm olaraq ADNSU-nun qəhrəman məzunlarının ailələri ilə sıx əlaqə saxlayacaq, onların problemlərinin həllinə kömək göstərəcək.

Sonra nümayəndə heyəti şəhid ailələrinə bayram sovqatı təqdim edib.