2022/2023-cü tədris ili üzrə Azərbaycan Texniki Universitetinin (AzTU) magistratura səviyyəsində təhsil almaq istəyən bakalavrlar üçün ixtisas seçimi başlayıb.  

AzTU-dan bildirilib ki, ixtisas seçimi magistratura səviyyəsi və "SABAH Magistratura" proqramına, ümumilikdə 36 ixtisas üzrə keçirilir. Həmçinin MBA proqramına da ixtisas seçimi elan olunub. MBA proqramına qəbul yalnız ödənişli əsaslarla aparılır.

AzTU-da magistratura üzrə tədris proqramları universitetin əməkdaşlıq etdiyi Türkiyə və Avropanın qabaqcıl ali təhsil müəssisələrinin tədris proqramlarına uyğunlaşdırılıb. Magistratura səviyyəsində, əsasən tədqiqatlara üstünlük verilir ki, bu da tələbələrin gələcək karyeralarına müsbət təsir göstərir.

Qeyd edək ki, magistratura səviyyəsində dərslər saat 18:30-da başlayır.

İxtisas seçimi iyulun 5-dək aparılacaq.