Azərbaycan Dövlət Pedaqoji Universitetinin (ADPU) Elmi Şurasında çıxış edən rektor professor Cəfər Cəfərov institusional akkreditasiya ilə bağlı özünüqiymətləndirmə hesabatının hazırlanaraq müvafiq quruma təqdim edildiyini,  bütün strukturlarda bu  sənədin ətraflı təhlilinin, müzakirələrin təşkilinin akkreditasiya prosesinə qədər son hazırlıq üçün olduqca faydalı olacağını bildirib.  C.Cəfərov deyib ki, institusional akkreditasiyadan sonra proqram akkreditasiyası başlanacaq:”Bu sahədə də artıq ADPU-nun təcrübəsi var, ADPU Tvinninq layihəsi çərçivəsində bir neçə fənnin proqram akkreditasiyasını 2019-cu ildə həyata keçirib”.

Ötən dövrün ümumi icmalına nəzər salan rektor beynəlxalq əlaqələrdə xeyli irəliləyişlərin baş verdiyini bildirib, son bir ay ərzində TÜRKSOY-un baş katibinin ADPU-da olmasını, xarici ali təhsil müəssisələrinin rəhbərləri ilə görüşlərin, Qərbi Azərbaycana qayıdışla bağlı universitetdə ilk ictimai dinləmənin, ADPU-nun kitabxanasındakı nadir kitab və əlyazmaların ictimai təqdimatının keçirilməsini və s. yüksək qiymətləndirib.

Sonra tədris işləri üzrə prorektor dosent Eldar Aslanov ADPU-da payız semestrinin qış imtahan sessiyasının yekunları və qarşıda duran vəzifələr haqqında məruzə ilə çıxış edib. Məruzədə qeyd olunub ki, 9884-ü bakalavr və 621-i magistrant olmaqla, ümumilikdə 10505 nəfər üçün ADPU-nun Sahil və Gənclik tədris binalarında, o cümlədən ARTİ-nin Təhsil Texnologiyaları Mərkəzində imtahanlar təşkil olunub. İxtisas və fənn xüsusiyyətləri nəzərə alınmaqla, imtahanlar yazılı, şifahi və hibrid formada keçirilib. İmtahan sessiyasının yekunlarına görə, müvəffəqiyyət və keyfiyyət göstəriciləri ötən tədris ilinin analoji semestrinə nisbətdə müvafiq olaraq, 78 faizdən 84 faizə və 38 faizdən 46 faizə yüksəlib. Magistratura səviyyəsində bu göstəricilər müvafiq olaraq, 74 və 68 faiz təşkil edib. Filiallar və kollec üzrə də müvəffəqiyyət və keyfiyyət göstəricilərində artım müşahidə olunur.

Vurğulanıb ki, sessiya dövründə Apelyasiya Komissiyasına, ümumilikdə 3065 müraciət daxil olub ki, bunlardan da 46,5 faizi müsbət həll edilib, 36,5 faizi qüvvədə saxlanılıb, 16,5 faizi müraciətdən imtina edib. Bildirilib ki, tədrisin keyfiyyətinin artırılması və tələbələrlə aparılan ardıcıl iş nəticəsində bütün parametrlər üzrə göstəricilərdə irəliləmə müşahidə olunur. Əgər ötən tədris ilində İmtahan Qərargahına 294 müraciət daxil olmuşdusa, cari ildə cəmi 86 müraciət daxil olub, onlardan da 49 nəfər izahat işlərindən sonra müraciətdən imtina edib, 14 müraciət təsdiqini tapmayıb, qayda pozuntusuna görə cəmi ötən tədris ilində 438 iş protokollaşdırılmışdısa, cari ildə cəmi 157 nəfərin imtahan işi protokollaşdırılıb, barələrində inzibati-tənbeh tədbirləri görülmüş tələbələrin sayı isə 25-dən 16-a düşüb.
Məruzədən sonra Tədbirlərin təşkili və tələbələrlə iş şöbəsinin müdiri Turan Kərimli sessiya dövründə tələbələrlə keçirilən onlayn sorğunun nəticələrini təqdim edib.

Bildirilib ki, onlayn sorğuda ADPU, filiallar və kollec də daxil olmaqla, ümumilikdə 2590 tələbə iştirak edib ki, onların əksəriyyəti imtahan və tədris prosesinin təşkilini yaxşı qiymətləndirir. Bununla belə, tələbələr tərəfindən bildirilən bəzi problem və təkliflər də ümumiləşdirilərək universitet rəhbərliyinə təqdim olunur.

Məruzələrin yekununa əsasən, tətbiq olunan yeni imtahan qaydalarının effektiv nəticələri qeyd edilib, qarşıda duran vəzifələr diqqətə çatdırılıb.
Həmçinin iclasda ADPU-da “Heydər Əliyev İli” çərçivəsində görüləcək işlər, universitetin Himayəçilər Şurasının yaradılması, "ADPU 2030" Strateji İnkişaf Planının hazırlanması, beynəlxalq əlaqələrin inkişafı, yeni ikili diplom proqramlarının həyata keçirilməsi kimi məsələlər də müzakirə olunub.

Daha sonra cari semestrin nəticələrinə əsasən, adlı təqaüdə layiq görülən 12 nəfər tələbənin siyahısı təsdiq olunub.