SOCAR-ın təşkilatçılığı ilə Bakı Ali Neft Məktəbində (BANM) Ulu Öndər Heydər Əliyevin 100 illik yubileyi münasibətilə tədbir keçirilib.

Tədbirdə SOCAR-ın rəhbər heyəti, BANM-In müəllim və tələbə kollektivi iştirak edib.

Tədbirdə çıxış edən SOCAR-ın prezidenti Rövşən Nəcəf ölkəmizin əldə etdiyi bütün nailiyyətlərin təməlində Ulu Öndər Heydər Əliyevin uzaqgörən və müdrik siyasəti nəticəsində müəyyənləşdirilən hərtərəfli inkişaf strategiyasının dayandığını vurğulayıb.

R.Nəcəf Ümummilli Liderin strateji inkişaf konsepsiyasının əsas istiqamətlərindən birinin də yeni enerji strategiyası olduğunu bildirib. SOCAR prezidenti xarici sərmayədarların Azərbaycanın neft-qaz yataqlarının işlənilməsinə cəlb olunmasının, xam neftin və qazın nəqli yollarının şaxələndirilməsinin, gəlirlərin səmərəli idarə olunmasının Ulu Öndərin dayanıqlı enerji strategiyasının əsas istiqamətləri olaraq müəyyənləşdirildiyini diqqətə çatdırıb.

R.Nəcəf Prezident  İlham Əliyevin rəhbərliyi ilə bütün sahələrdə böyük nailiyyətlərə imza atan ölkəmizin bu gün tarixinin ən parlaq dövrünü yaşadığını diqqətə çatdırıb.

Uzun illər ərzində Ümummilli Lider Heydər Əliyev ilə birgə çalışmış SOCAR-ın birinci vitse-prezidenti, akademik Xoşbəxt Yusifzadə tədbirdə çıxış edərək Ulu Öndərlə bağlı xatirələrini bölüşüb.

Müstəqilliyin ilk illərində ölkəmizdə neft sənayesinin də böhran vəziyyətində olduğunu söyləyən Xoşbəxt Yusifzadə 1994-cü il sentyabrın 20-də “Əsrin müqaviləsi”nin imzalanması ilə Azərbaycanın yeni neft salnaməsinin əsasının qoyulduğunu diqqətə çatdırıb. X.Yusifzadə bu müqavilənin Ulu Öndər Heydər Əliyevin yüksək şəxsi nüfuzu, qətiyyətli mövqeyi ilə imzalandığını bildirib, Ümummilli Liderin yeni neft strategiyası nəticəsində ölkəmizin neft-qaz sənayesinin böyük inkişaf yolu keçdiyini, Azərbaycanın regionun lider dövlətinə çevrildiyini qeyd edib.

Ulu Öndərin möhkəm təməllər üzərində qurduğu Azərbaycanın ötən illər ərzində böyük tərəqqi yolu keçdiyini söyləyən BANM-in rektoru Elmar Qasımov müstəqil Azərbaycanın dövlət quruculuğunun, iqtisadi dirçəlişinin, bütün sahələrdə davamlı inkişafının Ulu Öndər Heydər Əliyevin adı ilə bağlı olduğunu vurğulayıb.

Ümummilli Liderin hər zaman Azərbaycan gəncliyinə böyük ümidlər bəslədiyini qeyd edən rektor dahi şəxsiyyət Heydər Əliyevin mənalı həyat yolunun və çoxşaxəli fəaliyyətinin hər bir gənc üçün əsl nümunə olduğunu bildirib.

Daha sonra BANM-ın tələbəsi, “SOCAR Könüllüləri” qrupunun rəhbəri Murad Əliyev çıxış edərək, Ulu Öndər Heydər Əliyevin əsasını qoyduğu gənclər siyasətindən, ölkə başçısı tərəfindən gənclərə göstərilən yüksək diqqət və qayğıdan, ölkəmizdə geniş vüsət alan könüllülük hərəkatından bəhs edib.

Sonra tələbələr tərəfindən Ulu Öndər Heydər Əliyevin sevdiyi musiqi və şeirlərdən ibarət bədii kompozisiyalar təqdim olunub.