İyunun 11-də Azərbaycanın orta və ali təhsil sistemində informatika fənninin təşəkkülündə və inkişafında əvəzsiz xidmətləri olan görkəmli alim və pedaqoq Ramin Mahmudzadənin xatirəsinə həsr edilmiş ALPLogo proqramlaşdırma olimpiadası və “Ən yaxşı üçölçülü model” müsabiqəsinin qaliblərinin mükafatlandırılma mərasimi keçirilib.

Bakı şəhəri 283 nömrəli tam orta məktəbdə  təşkil olunan tədbirdə Təhsil İnstitutu yanında Tədris Resursları Mərkəzinin direktor müavini İsmayıl Sadıqov,  mərkəzin  şöbə müdiri Əsgər Quliyev, “Multimedia” İnformasiya Sistemləri Texnologiyaları Mərkəzinin direktoru, Azərbaycan İnternet Forumunun prezidenti Osman Gündüz, “Paşa Sığorta” şirkətinin  İnformasiya Texnologiyaları və İnnovasiyalar Departamentinin direktoru  Cəmşid  Naxçıvanski, ADA Universiteti School of  IT & Engineering  Məktəbinin professoru Mixail Medvedyev, “İdrak” liseyinin İnnovativ Təhsil Texnologiyaları Departamentinin rəhbəri Gülnarə Səlimova, Bakı şəhəri  267 nömrəli məktəb-liseyin informatika müəllimi Sənubər Məmmədova, 276 nömrəli tam orta məktəbin informatika müəllimi Əlinazim Mahmudzadə, qalib şagirdlər və  onların müəllimləri iştirak ediblər. Mərasimdə öncə  görkəmli pedaqoq   Ramin Mahmudzadənin xatirəsi bir dəqiqəlik sükutla yad olunub.

Tədbiri Bakı şəhəri 283 nömrəli tam orta məktəbin informatika müəllimi, “İnformatika” dərsliklərinin həmmüəllifi, Əməkdar müəllim Naidə İsayeva giriş sözü ilə açaraq tanınmış alim Ramin Mahmudzadənin  XX əsrin ikinci yarısından yeni yaranan kompüter elmlərinin (informatika) Azərbaycanda inkişafındakı böyük rolundan  danışıb. Tanınmış pedaqoqun İT sahəsində ilk azərbaycanlı mütəxəssislər  hazırlayan alim olduğu diqqətə çatdırılıb.

Sonra Bakı şəhəri 283 nömrəli tam orta məktəbin direktoru Sevinc Musayeva, Təhsil İnstitutu yanında Tədris Resursları Mərkəzinin direktor müavini İsmayıl Sadıqov, “Multimedia” İnformasiya Sistemləri Mərkəzinin direktoru, Azərbaycan İnternet Forumunun prezidenti Osman Gündüz çıxış ediblər.

Çıxış edənlər informatikanın  ən mühüm və vacib fənlərdən biri kimi əksər dünya ölkələrinin təhsil sistemlərində öyrənilməsinə xüsusi diqqət yetirilməsindən,  onun insanın zehni inkişafına kömək etməsindən, məntiqi təfəkkürün formalaşmasında, mühakimə və dərketmə qabiliyyətlərinin yüksəlməsində vacib rolundan  danışıblar.

Qeyd olunub ki, informatika insanların elmi, praktiki biliklərinin genişlənməsində, yeni ixtisaslara yiyələnməsində mühüm rol oynayır. İnformatika fənni insanları informasiyalaşmış cəmiyyətdə praktik həyati fəaliyyətə hazırlayır, dünyadakı elektron informasiya resurslarını təhlil etmək bacarıqlarını formalaşdırır.

Çıxışlarda son illər Azərbaycanda informatika fənninə marağın  artmasından, istər Bakı , istərsə də respublikamızın müxtəlif  bölgələrindən olan şagirdlərin  bu fənn üzrə keçirilən olimpiada və müsabiqələrə həvəslə qatılaraq yüksək nəticələr əldə etmələrindən məmnunluq ifadə olunub. O da vurğulanıb ki,  bu il ilk dəfə olaraq abituriyentlər informatika fənni üzrə qəbul imtahanı veriblər və bu  da onun bir daha həyatımızdakı önəmini göstərir.

Çıxış edənlər ALPLogo və SketchUp ümumrespublika yarışları qaliblərini və  onların müəllimlərini ədə etdikləri uğur münasibəti ilə təbrik edərək, onlara gələcək fəaliyyətlərində nailiyyətlər arzulayıblar.

Sonra ALPLogo proqramlaşdırma olimpiadasının və SketchUp müsabiqəsinin qalibləri elan edilib. ALPLogo proqramlaşdırma olimpiadasının nəticələrinə əsasən, 8 nəfər I, 12 nəfər II, 14 nəfər  III və 7 nəfər IV yerlərə layiq görülüb. 

SketchUp müsabiqəsində  isə 2 nəfər I, 3 nəfər II, 4 nəfər III və 7 nəfər IV yerləri tutub. Qalib şagirdlərə mükafatlar  təqdim edilib. Bu yarışların təşkilində fəal iştirak edən  və şagirdləri qalib olan  informatika müəllimlərinə sertifikatlar verilib.

Məlumat üçün bildirək ki, ALPLogo komandalar sistemi Azərbaycan dilində olan ilk proqramlaşdırma mühitidir.

LOGO proqramlaşdırma dili dünyanın bir çox dilləri üçün lokallaşdırılmışdır. Bu dil vasitəsilə kiçikyaşlı məktəblilər proqramlaşdırma konsepsiyasının əsaslarını öyrənir, onlarda düşüncə və məsələ həlli vərdişləri inkişaf etdirilir. LOGO mühiti uşaq personajına çevrilmiş bağanın hərəkətlərinin proqramlaşdırılmasına əsaslanır. Bağa hərəkət etdikcə iz qoyur və nəticədə rəngarəng görüntülər alınır.

ALPLogo adlanan Azərbaycan versiyası 2012-ci ildə ümumtəhsil məktəbləri üçün “İnformatika” dərsliklərinin müəllifləri Ramin Mahmudzadə, İsmayıl Sadıqov, Naidə İsayeva və proqramçı Cəmşid Naxçıvanskidən ibarət qrup tərəfindən “Bakı” nəşriyyatında işlənib hazırlanmış və bugünədək respublika məktəblərində böyük uğurla istifadə olunmaqdadır. Proqram mühiti V, VI və VII sinif  “İnformatika” dərsliklərinə daxil edilmiş və respublika məktəblərinə ödənişsiz yayılması təmin olunmuşdur. Proqramın başlıca özəlliyi komandaların Azərbaycan, ingilis və rus dillərində yazıla bilməsindədir. Azərbaycan və rus bölmələrində dərs zamanı müəllimlərin hər hansı dildə yazılmış hazır kodlardan asanca istifadə etmələri üçün proqramda interfeys dilinin dəyişdirilməsi ilə yanaşı, kodun bir dildən başqa dilə avtomatik çevrilməsi imkanı da vardır. ALPLogo proqramlaşdırma olimpiadasına ümumtəhsil  məktəblərinin  V-VII  sinif şagirdləri qatılırlar.

SketchUp proqramı isə  obyektlərin üçölçülü modellərini yaratmaq üçün nəzərdə tutulan müasir proqramlardandır.

Autodesk Maya, 3D Max, AutoCAD kimi mükəmməl və mürəkkəb proqramlarda işləmək üçün SketchUp proqramı çox uğurlu başlanğıcdır. Bu    proqramda iş vərdişlərinin formalaşdırılması informatikanın riyaziyyat, təsviri incəsənət, texnologiya fənləri ilə inteqrasiyasını təmin edir. “İnformatika” fənninin əsas məzmun xətlərindən birinin modelləşdirmə olduğunu nəzərə alaraq, SketchUp proqramı ilə bağlı mövzular 2011-ci ildə VII sinif “İnformatika” dərsliyinə daxil edilmişdir. Hazırda isə yeni kurikuluma uyğun olaraq, bu proqram  VIII  sinifdə öyrədilir. “Ən yaxşı üçölçülü model” müsabiqəsinə qatılan VII-X sinif şagirdləri də  məhz bir sıra obyektlərin üçölçülü modellərini hazırlayıblar.

5-6-cı sinif şagirdləri arasında keçirilən ALPLogo-2023 proqramlaşdırma olimpiadasının nəticələri

I yer

Əli Nəbiyev - Bakı şəhəri 261 nomrəli məktəb-lisey

Cavid Göyüşlü - Şuşa şəhəri 1 nömrəli tam orta məktəb

Emin Məmmədzadə - Balakən şəhəri 3 nömrəli tam orta məktəb

Leyla Qebedova - Balakən şəhəri 1 nömrəli tam orta məktəb

Səlim Saxrayev - Balakən rayonu Qazbinə kənd tam orta məktəbi

Onur Mehdili - Sumqayıt şəhəri 38 nömrəli tam orta məktəb

Rəsul Nağı - Balakən rayonu Qazbinə kənd tam orta məktəbi

II yer

Nihad Ağayev - İsmayıllı şəhəri 6 nömrəli tam orta məktəb

Əminə Ramazanlı - Bakı şəhəri “İdrak” liseyi

Kənan Cəbili - Bakı şəhəri 287 nömrəli tam orta məktəb

Süleyman Mürşüdov - Balakən rayonu Qazbinə kənd tam orta məktəbi

Amin Lətifli - Bakı şəhəri 283 nömrəli tam orta məktəb

Azad Kərimli - İsmayıllı şəhəri 6 nömrəli tam orta məktəb

Nihad Ramazanov - Quba rayonu Qırmızı Qəsəbə 1 nömrəli tam orta məktəb

Səttar Cabbarlı - Sumqayıt şəhəri Təbiət Elmləri Təmayüllü Gimnaziya

Türkel Zeynallı - Şamaxı rayonu Qızmeydan kənd orta məktəbi

III yer

Lalə Surxayeva - Balakən şəhəri 1 nömrəli tam orta məktəb

İsmayıl Balakişiyev - İsmayıllı şəhəri 6 nömrəli tam orta məktəb

Kərim Kərimli - Bakı şəhəri 261 nomrəli məktəb-lisey

Leyla Əlizadə - Şirvan şəhəri 1 nömrəli tam orta məktəb

Kamilə Əhməyeva - Balakən şəhəri 1 nömrəli tam orta məktəb

Lalə Sadıqova - Quba rayonu Zərdabi qəsəbə tam orta məktəbi

Sabir Hüseynov - Balakən şəhəri 1 nömrəli tam orta məktəb

Xəlil Xudayev - Şirvan şəhəri 1 nömrəli tam orta məktəb    

Saleh Mürşüdlü - Balakən rayonu Qazbinə kənd tam orta məktəbi

Nazlı Zərbiyeva - İsmayıllı şəhəri 3 nömrəli məktəb-lisey

7-ci sinif şagirdləri arasında keçirilən ALPLogo-2023 proqramlaşdırma olimpiadasının nəticələri

I yer

Zəhra Niyazlı - Sumqayıt şəhəri 38 nömrəli tam orta məktəb

II  yer

Mərd Rəsulov - Bakı şəhəri Elitar Gimnaziya   

Sahib İsgəndərli - Bakı şəhəri 295 nömrəli tam orta məktəb

Aydan Rəşidli - Bakı şəhəri 274 nömrəli tam orta məktəb   

III yer

İnci İsmayılzadə - Bakı şəhəri 261 nömrəli məktəb-lisey

Abdullah Əliyev - Bakı şəhəri 267 nömrəli məktəb-lisey

Rəhim İlyasov - Gəncə şəhəri 6 nömrəli tam orta məktəb    

Ədalət Hüseynli - İsmayıllı şəhəri 5 nömrəli tam orta məktəb

7-10 sinif şagirdləri arasında keçirilən “Ən yaxşı üçölçülü model” müsabiqəsinin nəticələri

I yer

Xədicə Məmmədzadə- Xırdalan şəhəri 2 nömrəli tam orta məktəb

Jalə Məmliyeva- Bakı şəhəri 182 nömrəli tam orta məktəb

II yer

Rakif Ağayev- Xızı rayonu Şorabad qəsəbə tam orta məktəbi

Ramil Aslanov - Şamaxı rayonu Qızmeydan kənd tam orta məktəbi

Elvin Ağakərimov - Quba rayonu Alekseyevka kənd tam orta məktəbi

III yer

Nicat Həsənov - İsmayıllı şəhəri 3 nömrəli tam orta məktəb

Amid Musayev - Şirvan şəhəri 16 nömrəli tam orta məktəb

Əli Məmmədov - Bakı şəhəri Kaspi liseyi

Zəhra Lətifli - Şəki şəhəri Fizika-riyaziyyat və humanitar təmayüllü lisey

Samirə KƏRİMOVA