Azərbaycan-Fransız Universitetində (UFAZ) 2024/2025-ci tədris ili üçün magistraturaya sənəd qəbulunun birinci mərhələsi hazırda davam edir.

UFAZ-dan bildirilib ki, sənəd qəbulunun 1-ci və ya 2-ci mərhələsində şərti qəbul olmuş namizədlər Dövlət İmtahan Mərkəzi (DİM) tərəfindən təşkil olunmuş magistratura imtahanında (minimum ingilis dilini bilməklə) 50-dən çox bal topladıqları halda UFAZ-ın magistraturasına qəbul oluna bilərlər (dil balı 20). Bakalavr səviyyəsindən UFAZ-a qəbul olmaq istəyən, təhsili ingilis dilində (Azərbaycan və ya rus dilində) olmayan namizədlər üçün IELTS-dən minimum 6,5 və ya TOEFL-dən 80 bal tələb olunur. Bakalavr təhsilini ingilis dilində bitirmiş namizədlər bunu təsdiqləyən sənəd təqdim etməlidirlər.

Magistraturaya, ümumilikdə 110 yer ayrılıb və bütün yerlər ödənişsizdir.  Sənəd qəbulunun birinci mərhələsi 5 noyabr 2023-cü il tarixində başlayıb və 30 yanvar 2024-cü il tarixinədək davam edəcək. Birinci mərhələnin nəticələri fevralın 15-də elan olunacaq. Onlayn qeydiyyat və sənəd qəbulu, Qəbulun ikinci mərhələsi 2024-cü il aprelin 1-dən aprelin 30-dək keçiriləcək və nəticələr 15 may 2024-cü il tarixində elan ediləcək.

Qeyd edək ki, UFAZ magistraturaya dörd ixtisas istiqaməti üzrə qəbul həyata keçirir:

●  Məlumat Elmləri və Süni İntellekt 

●  Fiziki Kimya/Kimya Mühəndisliyi 

●  Geologiya elmləri

●  Su Ehtiyatları və İdarəetmə