Gələcəyimiz bu gün etdiyimiz seçimlərdən asılıdır | |
Məlum olduğu kimi, sentyabrın 2-də Parisdə “Təhsil üçün İdarəetmə Texnologiyası” devizi altında UNESCO Rəqəmsal Öyrənmə Həftəsi öz işinə başlayıb.
Azərbaycanı tədbirdə elm və təhsil nazirinin müavini Həsən Həsənlinin rəhbərlik etdiyi nümayəndə heyəti təmsil edir.
“Azərbaycan müəllimi” xəbər verir ki, sentyabrın 5-dək davam edəcək tədbir təhsilin rəqəmsallaşdırılması, süni intellektin təhsildə istifadəsi, yaşıl və rəqəmsal çağırışlar kimi mövzuları əhatə edir.
Tədbiri açan UNESCO baş direktorunun təhsil üzrə müavini Stefania Ciannini qeyd edib ki, tarix boyu dünyanın ayaqlarımızın altında dəyişdiyi, öyrənmək, işləmək və yaşamaq tərzimizi əsaslı şəkildə dəyişdirdiyi kritik anlar olub.
“Bu gün biz belə bir dəyişikliyi yaşayırıq: cəmiyyətlərimizin sürətləndirilmiş texnoloji transformasiyası və təhsilə ciddi təsir göstərən ekoloji böhran. Əgər biz sosial cəhətdən ədalətli, iqtisadi cəhətdən əhatəli və ekoloji cəhətdən davamlı gələcəyi təmin etmək istəyiriksə, rəqəmsal transformasiya və yaşıl keçidi birləşdirməliyik”.
Stefania Ciannini təəssüflə bildirib ki, bu keçidlər heç də həmişə bir-biri ilə uzlaşmır və bəzən hətta bir-biri ilə ziddiyyət təşkil edir. “Bununla belə, məsələnin mahiyyəti sadədir: gələcəyimiz bu gün etdiyimiz seçimlərdən asılıdır. Təhsil rəqəmsal və yaşıl keçidləri birləşdirməyə kömək edə bilər. İcazə verin, bu körpünü necə qurduğumuza dair dörd ideyanı sizinlə bölüşüm:
Birincisi, multimedia və interaktiv rəqəmsal alətlər vasitəsilə iqlim dəyişikliyini anlamağa kömək edəcək texnologiyaya ehtiyacımız var.
İkincisi, tələbələrə hərəkətə keçməyi öyrədən təcrübi öyrənmə üçün istifadə edilə bilən texnologiyaya ehtiyacımız var.
Üçüncüsü, yaşıl enerji tədqiqatlarını və innovasiyaları stimullaşdırmaq üçün texnologiyaya ehtiyacımız var.
Nəhayət, və bəlkə də ən əsası, biz qlobal vətəndaşların gələcək nəslini iqlim dəyişikliyi də daxil olmaqla, günümüzün bir-biri ilə əlaqəli çağırışları ilə mübarizə aparmaq üçün bilik, bacarıq, ünsiyyət və davranışlarla təchiz etməliyik”.
Baş direktor hesab edir ki, bu vəzifələrə məhz təhsil vasitəsilə nail olmaq olar: “Bunun üçün süni intellektin nə olduğunu, necə işlədiyini, eləcə də güclü tərəflərini, məhdudiyyətlərini və risklərini bilməlisiniz. Bu həftə UNESCO müəllimlər və tələbələr üçün yeni süni intellekt səriştələri çərçivəsini işə salacaq ki, bu da bu biliklərin necə qurulması və “AI nəsli”nin yaradılması haqqında aydın fikirlər verəcək”.
Tədbirdə Beynəlxalq Telekommunikasiya İttifaqının baş katibi Dorin Boqdan-Martinin video müraciəti dinlənilib.
“Rəqəmsal Öyrənmə Həftəsi 2024” çərçivəsində təhsil nazirləri səviyyəsində “dəyirmi masa” keçirilib və burada Dayanıqlı İnkişaf Məqsədlərinə nail olmaq üçün süni intellektin təhsilə inteqrasiyası məsələləri müzakirə edilib.
Qeyd edək ki, Rəqəmsal Öyrənmə Həftəsinin mövzusu rəqəmsal transformasiya və “yaşıl” təhsil arasında qarşılıqlı əlaqəyə xüsusi diqqət yetirməklə təhsildə süni intellektdən istifadənin tətbiqidinə həsr olunub.
Oruc MUSTAFAYEV
|
|
![]() |
03.09.2024 | 11:37 |
|
|
|