Sentyabrın 16-da Heydər Əliyev Fondu tərəfindən Şamaxı rayonunun Hacıqədirli kənd tam orta məktəbi üçün inşa edilmiş 132 şagird yerlik məktəb binası istifadəyə verilib. 

 

"Azərbaycan müəllimi" xəbər verir ki, açılış mərasimində Heydər Əliyev Fondunun nümayəndəsi Şamil Əzizov, Şamaxı Rayon İcra Hakimiyyətinin başçısı Tahir Məmmədov, Dağlıq Şirvan Regional Təhsil İdarəsinin müdir səlahiyyətini icra edən Həmid Qasımov, təhsil işçiləri, müəllimlər, şagirdlər və kənd sakinləri iştirak etmişdir.

 

Tədbirin əvvəlində Azərbaycanın Dövlət Himni səsləndirilib, şəhidlərin xatirəsi bir dəqiqəlik sükutla yad olunub.

 

Qonaqlar məktəbdə yaradılmış şəraitlə tanış olub. Bildirilib ki, 132 şagird yerlik ikimərtəbəli məktəb binası 3 korpusdan ibarətdir. Məktəb zəruri mebel və avadanlıqlarla, fənn kabinetləri və laboratoriyalar isə əyani vəsaitlərlə tam təchiz edilib. Burada 10 sinif otağı, fizika, kimya laboratoriyaları, informatika, hərbi təlim və əmək təlimi otaqları, kitabxana, yeməkxana, akt və idman zalı, açıq idman meydançası var. Yeni tədris ocağı daimi su, istilik sistemi, eləcə də yanğın xəbərverici və videomüşahidə sistemləri ilə təmin edilib. 

 

Elnarə QASIMOVA, 

Dağlıq Şirvan üzrə regional təmsilçi