Rusiyada yeni məktəblər yaradılır | |
Rusiya regionlarında yeni məktəblərin yaradılmasına başlanılıb. Layihənin təşəbbüskarları Rusiyanın Maarif Nazirliyi və Elmlər Akademiyasıdır. “Uçitelskaya qazeta”nın məlumatına əsasən, layihə barədə maarif naziri Olqa Vasilyeva və Rusiya Elmlər Akademiyasının (REA) prezidenti Aleksandr Sergeyev “İnvestisiya Forumu - 2019” çərçivəsində keçirilən forumda məlumat veriblər. Ən yaxşı ümumtəhsil müəssisələrinin bazasında yaradılacaq məktəblər elmi institutların himayəsi altında işləyəcək. Nazir Olqa Vasilyeva bəhs olunan məktəblərin ölkənin ən yaxşı top 500 və top-200 kənd məktəbləri arasından seçildiyini deyib.
“Biz həqiqətən ciddi narahatlıq keçiririk, ən yaxın illərdə gənc, motivasiyalı, yaradıcı, güclü uşaqların elmə axınını təmin etməyə məcburuq. Ölkə qarşısında qoyulmuş hədəfə yalnız iqtisadiyyatımızı elmi innovasiya relsinə çıxarmaqla çata bilərik. Buna görə biz dayaq məktəblərinin yaradılması vasitəsilə görüləcək tədbirləri müəyyən etməyə çalışdıq ki, genetik olaraq elmə meyilli olan istedadlı uşaqlar başqa sahələrə getməsinlər”, - deyə Rusiya Elmlər Akademiyasının prezidenti Aleksandr Sergeyev bildirib. Bütövlükdə pilot layihədə 32 regiondan 110 məktəb iştirak edəcək. Maarif Nazirliyi qeyd edir ki, “eksperimental proqramın iştirakçı heyəti elmi institutların, iri federal və milli tədqiqat universitetlərinin yaxınlığı nəzərə alınmaqla REA -nın nümayəndələri tərəfindən formalaşdırılıb”.
Maarif naziri Olqa Vasilyeva layihənin reallaşdırılmasında rəhbərlik etdiyi nazirliyin üzərinə düşən vəzifələrdən danışıb. “Biz layihədə öz köməyimizi, birincisi, normativ-hüquqi aktların yaradılmasında görürük. Bələdiyyə məktəblərinin regionların tabeçiliyinə ötürülməsi sadə məsələ deyil, amma həll edilə bilər. Amma hansı məktəbləri seçmək - Akademiyanın məsələsidir. Akademiyanın bunu etmək üçün lazım olan bütün imkanları var. Və ən vacibi, akademiyanın üzvləri və kafedraların əməkdaşları bizim uşaqlarla işləyə, uşaqlar da öz növbəsində REA-nın elmi alətlər dəstindən istifadə edə biləcəklər. Amma qeyd etməliyəm ki, bu, bahalı layihədir. Pulun yarısı federal büdcədən, yarısı biznesin hesabına ödənilir”, - deyə Olqa Vasilyeva bildirib.
Dayaq məktəblərin inkişafının əsas istiqaməti ölkənin aparıcı alimlərinin təhsil prosesində iştirakı yolu ilə təhsilin keyfiyyətinin artırılması, elmi-praktik konfransların təşkili, gənc alimlərin elm və təhsil müəssisələrinə axınını təmin etməkdir.
Oruc MUSTAFAYEV
|
|
![]() |
23.02.2019 | 11:01 |
|
|
|