Paytaxt məktəbliləri Brüsseldə ölkəni təmsil edəcək

Bakı Şəhəri üzrə Təhsil İdarəsinin tabeliyindəki 257 nömrəli tam orta məktəbin X sinif şagirdi Fərid Rəcəbov və 220 nömrəli məktəb-liseyin VII sinif şagirdi Pərviz Fərzəliyev Azərbaycanda keçirilən “Avropa Pul Viktorinası”nın milli mərhələsinin qalibi olublar.

 

Hər iki şagird Avropa Banklar Federasiyası tərəfindən 6-7 may tarixində Brüsseldə keçiriləcək “Avropa Pul Viktorinası”nın final mərhələsində ölkəmizi təmsil etmək hüququ qazanıb.

 

Qeyd edək ki, “Avropa Pul Viktorinası” məktəblilərin maliyyə savadlılığının artırılması məqsədilə keçirilir. Viktorinada iştirak edən 13-15 yaşlı məktəblilərə bank-maliyyə xidmətləri, pul nişanlarının emissiyası və tədavülü, rəqəmsal ödənişlər və vergilər kimi iqtisadi mövzular üzrə suallar verilir.

 

Azərbaycanda təşkil olunan “Avropa Pul Viktorinası”nın milli mərhələsi 2 turdan ibarət olub. I turda viktorinada iştirak etmək üçün müraciət etmiş 500-dən artıq şagirdin bilikləri qiymətləndirilib. Ən yüksək göstəriciləri olan 106 şagird II turda iştirak etmək hüququ qazanıb.

 

II turda şagirdlər yarışın formatına uyğun olaraq iqtisadi mövzuları əhatə edən sualları cavablandırıblar.

 

Yekunda I, II və III yerin qaliblərinə mükafatlar, digər iştirakçılara isə müxtəlif hədiyyələr və sertifikatlar təqdim olunub.

 

Onu da qeyd edək ki, “Avropa Pul Viktorinası”nın milli mərhələsi Mərkəzi Bank və Azərbaycan Banklar Assosiasiyasının təşəbbüsü, Almaniya Beynəlxalq Əməkdaşlıq üzrə Əmanət Kassaları Fondunun və Təhsil Nazirliyinin birgə təşkilatçılığı ilə keçirilib.

 



10.04.2019 | 11:19