AzMİU ilə İstanbul Texniki Universiteti arasında Niyyət Protokolu imzalanıb

Türkiyənin nüfuzlu İstanbul Texniki Universitetinin (İTU) rektoru professor Mehmet Karacanın rəhbərlik etdiyi nümayəndə heyəti Azərbaycan Memarlıq və İnşaat Universitetinin (AzMİU) qonağı olub.

 

Nümayəndə heyəti AzMİU-nun rektoru, professor Gülçöhrə Məmmədova ilə görüşdükdən sonra universitetin Elmi Şurasının növbədənkənar iclasına qatılıb.

 

Rektor G.Məmmədova bugünkü görüşü rəhbərlik etdiyi universitetin həyatında tarixi gün kimi dəyərləndirib. İTU ilə ikitərəfli əlaqələrin hələ 2002-ci ildən qurulduğunu yada salan rektor bu illər ərzində birgə görüşlərin, müzakirələrin, ikili diplom müqavilələrinin imzalanması istiqamətində ilkin razılaşmaların əldə olunduğunu bildirib. O, 2008-ci ildə AzMİU ilə İTU arasında ikili diplom proqramı üzrə müqavilənin imzalandığını, lakin Türkiyə Respublikasının Yüksək Öyrətim Kurulu tərəfindən razılığın əldə olunmadığını bildirib. Ötən ilin sentyabrında İnşaat mühəndisliyi ixtisası üzrə İkili diplom müqaviləsinin artıq reallaşdığını yada salan professor G.Məmmədova bugünkü görüşdə Memarlıq ixtisası üzrə Niyyət protokolunun imzalanacağını Şura üzvlərinin diqqətinə çatdırıb.

 

İTU rektoru, professor Mehmet Karaca da öz növbəsində rəhbərlik etdiyi universitet barədə geniş məlumat verib.  Rektor İTU-nun beynəlxalq əlaqələrindən, beynəlxalq reytinq cədvəllərində tutduğu yerlərdən də danışıb. O, AzMİU ilə əlaqələrin genişlənməsinə böyük dəyər verildiyini, bu görüşün həmin istiqamətdə gedən müzakirələrin davamı kimi qiymətləndirib.

 

Sonra AzMİU ilə İTU arasında Niyyət Protokolu imzalanıb.

 

Memarlıq ixtisası üzrə ikili diplom müqavilələrinin reallaşmasını nəzərdə tutan Niyyət Protokolu üzrə müvafiq addımların atılacağını deyən G.Məmmədova bu anlaşmanın hər iki tərəf üçün uğurlu olmasını, universitetlər arasında əməkdaşlığın daha da genişlənməsini arzulayıb.

 

G.Məmmədova Elmi Şuranın qərarına əsasən, İTU rektoru M.Karacaya AzMİU-nun “Fəxri doktoru” adının verildiyini bildirib və diplomu rektora təqdim edib.

 

Məlumat üçün qeyd edək ki, AzMİU-nun fəxri doktorları arasında yer alan Türkiyənin keçmiş prezidenti Süleyman Dəmirəl də İTU-nun məzunudur.

 



23.04.2019 | 11:52