Öyrənmək, təcrübə mübadiləsi aparmaq imkanı

İyunun 25-də Bakı şəhəri  M.Müşfiq adına 18 nömrəli tam orta məktəbdə  “Müasir dövrdə ümumi təhsilin aktual problemləri” mövzusunda pedaqoji mühazirələrin respublika mərhələsi keçirilib.  Nazir müavini Məhəbbət Vəliyeva Təhsil naziri Ceyhun Bayramovun müvafiq əmrinə əsasən   pedaqoji mühazirələrin təşkil edildiyini söyləyərək əsas məqsədin ümumi təhsil sahəsində keyfiyyət göstərcilərinin yaxşılaşdırılması ilə bağlı aktual məsələlərə diqqəti artırmaq, təhsil işçilərinin bu barədə rəy və mülahizələrini öyrənmək, yaradıcı müəllim və məktəb rəhbərlərini aşkara çıxarmaq, qabaqcıl təcrübə nümunələrini təbliğ etmək və  perspektiv üçün inkişafyönlü təkliflər hazırlamaqdan ibarət olduğunu bildirib. Məlumat üçün qeyd edib ki, pedaqoji mühazirələr iki mərhələdə - rayon (şəhər) və ölkə mərhələləri üzrə təşkil olunub: “Rayon (şəhər) mərhələsi bu ilin fevral-mart aylarında keçirilib. Bu mərhələdə 3642 pedaqoji mühazirə dinlənilib. Onlardan 182-si seçilərək respublika mərhələsinə təqdim olunub. Həmin mühazirələr Təhsil Nazirliyinin İşçi qrupu tərəfindən oxunub. Respublika mərhələsində proqrama 18 bölmə üzrə 155 pedaqoji mühazirə daxil edilib”. Pedaqoji mühazirələrin keçirilməsinin əhəmiyyətinə toxunan  Məhəbbət Vəliyeva  təhsil işçilərinin bu tədbirə  böyük həvəslə  qatılmalarını müsbət qiymətləndirib: “Pedaqoji mühazirələr  təhsil işçilərinin bir-birindən öyrənmək  baxımından,  həmçinin təcrübə mübadiləsi aparmaq üçün əlverişli şərait yaradır. Təhsil işçilərini bir araya gətirən, pedaqoji fəaliyyətin ən müxtəlif aspektləri  ilə yaxından tanışlığın,  ümumi təhsil sahəsində keyfiyyət göstəricilərinin yaxşılaşdırılması   yönündə   belə   vahid müzakirə platformasının yaradılması düşünürəm ki, olduqca faydalıdır”.

 

Təhsil nazirinin müavini Məhəbbət Vəliyeva təhsilin müxtəlif sahələrini əhatə edən bölmələr üzrə keçirilən pedaqoji mühazirələri dinləyib, burada çıxış edən müəllimlərə müəyyən tövsiyələr verib, onlarla geniş  fikir mübadiləsi aparıb.

 

Pedaqoji mühazirələrdə paytaxtla yanaşı, respublikanın bütün bölgələrindən  təmsil olunan məktəb  rəhbərləri, müəllimlər, metodistlər, psixoloqlar öz təcrübələrini həmkarları ilə bölüşüblər.

 

Elə söhbətləşdiyimiz  təhsil işçiləri də Təhsil Nazirliyinin nümayəndələri, tanınmış alim və mütəxəssislərin qarşısında təqdimat etmələrini onların peşəkarlıq səviyyəsinin,  yaradıcılıq potensialının üzə çıxarılmasında mühüm rol oynadığını söyləyirlər.

 

 

“Təkcə öz  iş təcrübəmizdən danışmırıq”

 

 

Bilal Hüseynov Cəlilabad rayonu Alar kənd 3 nömrəli tam orta məktəbin Azərbaycan dili və ədəbiyyat müəllimidir. 42 illik müəllimlik stajına malik pedaqoq ilk dəfədir ki,  pedaqoji mühazirələrdə iştirak edir: “ Yaradıcı yazılar vasitəsi ilə şagirdlərin idrak fəaliyyətinin inkişaf etdirilməsi”  mövzusunda təqdimatla pedaqoji mühazirələrə qatılmışam. Pedaqoji mühazirələrin keçirilməsi  biz təhsil işçiləri üçün olduqca əhəmiyyətlidir. Müəllim təqdim etdiyi mühazirəsində öz işinə yaradıcı yanaşmasını,  əldə etdiyi təcrübəni həmkarlarına ətraflı çatdırmağı bacarmalıdır. Burada hər bir müəllimin çıxışının  özü sanki onun pedaqoji fəaliyyətinin bir növ hesabatıdır. Belə ki, müəllimlər tədris etdikləri  fənlə, dərsin təşkili ilə bağlı mülahizələrini bildirir,  həm də fikirlərini  söyləyərkən özündən əvvəlki mövcud təcrübəni öyrənir, ümumiləşdirir və öz təcrübəsi ilə birlikdə digər təhsil işçilərinə çatdırır.

 

Pedaqoji mühazirələr  yaradıcı müəllimlərin aşkara çıxarılmasında mühüm rol oynayır. Müəllimlər gördükləri işin vacibliyini, məsuliyyətini  dərk edirlər.

 

Pedaqoji mühazirələrdə biz təkcə öz  iş təcrübəmizdən danışmırıq, eyni zamanda başqalarının təcrübəsi ilə də tanış oluruq”.

 

 

“Mühazirəm respublika mərhələsinə təqdim olundu”

 

 

Aytac İsgəndərli Şəmkir rayonu Morul kənd tam orta məktəbinin coğrafiya müəllimidir. Gənc müəllim kimi təhsillə bağlı belə bir ölkə miqyaslı tədbirdə iştirakının onun üçün böyük motivasiya olduğunu söyləyir: “Coğrafiya fənni üzrə şagirdlərin təlim nailiyyətlərinin yaxşılaşdırılmasında İKT-nin imkanlarından necə istifadə edirəm” mövzusu ilə pedaqoji mühazirələrdə iştirak etdim və mühazirəm respublika mərhələsinə təqdim olundu. Müəllimlik fəaliyyətimin birinci ilində pedaqoji mühazirələrin respublika mərhələsinə kimi gəlməyim məni sevindirir”.

 

O, uzunillik təcrübəsi olan müəllimlərin burada öz təcrübələri ilə bağlı çıxışlarının  da məhz  onun kimi neçə-neçə gənc müəllim  üçün görüb-götürmək baxımından faydalı olacağını düşünür.

 

 

“Pedaqoji fəaliyyətimdə uğur qazanmaq istəyirəm...”

 

 

Bu, həmsöhbətimiz olan  Qubadlı rayonu Dondarlı kənd tam orta məktəbinin informatika müəllimi Gülnar Allahverdiyevanın ən böyük arzusudur. “Məktəb həyatının maraqlı qurulması barədə mülahizələrim” mövzusunda mühazirəsinin  respublika mərhələsinə vəsiqə qazanmasını gələcək fəaliyyətində əldə etmək istədiyi uğurlarının başlanğıcı hesab edir. “Pedaqoji fəaliyyətimdə uğur qazanmaq istəyirəm, - deyir. Bunun üçün isə bilirəm ki, üzərimdə çox çalışmalı, bir peşəkar, bacarıqlı  müəllim kimi özümü təsdiqləməliyəm. Pedaqoji mühazirələr bizə müəllim həmkarlarımızın fəaliyyəti ilə yaxından tanış olmaq, əldə etdiyimiz təcrübəni paylaşmaq baxımından çox önəmlidir”. 

 

 

“Yaradıcı müəllimlərin aşkarlanmasına əvəzsiz dəstək”

 

 

Sumqayıt şəhəri 1 nömrəli tam orta məktəbin Azərbaycan dili və Ədəbiyyat müəllimi Aidə Ələkbərova Təhsil Nazirliyinin həyata keçirdiyi layihələrdə  mentor-təlimçi kimi fəaliyyət göstərib. Eyni zamanda Azərbaycan dili və Ədəbiyyat dərsliklərinin qiymətləndirilməsində  ekspert kimi çalışır. O, pedaqoji mühazirələrin müəllimlərin pedaqoji təcrübələrinin yayılmasında,  müasir təhsil metodlarını öz  işində tətbiq etməyi bacaran müəllimlərin aşkarlanmasında mühüm rol oynadığını söyləyir: “Respublikanın qabaqcıl müəllimləri ilə təcrübə mübadiləsində iştirak etmək,  onların fəaliyyətindən yararlanmaq xüsusilə gənc müəllimlər üçün olduqca vacibdir. Hər zaman təcrübəmi digər həmkarlarımla bölüşməyə, eyni zamanda öyrənməyə də hazıram. Mənim fikrimcə, qatıldığımız pedaqoji mühazirələr  Təhsil Nazirliyinin  innovativ fikirli, yaradıcı  müəllimlərin aşkarlanmasına, qabaqcıl təcrübə nümunələrinin təbliğinə göstərdiyi əvəzsiz dəstəkdir”.

 

 

Samirə KƏRİMOVA



28.06.2019 | 11:23