Zəngəzurun tarixinə dair elmi-populyar kitabın təqdimatı keçirilib

AMEA-nın Mərkəzi Elmi Kitabxanasında Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının layihəsi çərçivəsində  "Zəngəzur" Cəmiyyətləri İctimai Birliyi tərəfindən nəşr edilən "Zəngəzur: 100 sual, 100 cavab" adlı kitabın və "Zəngəzur" tarixi sənədli filminin disk-albomunun təqdimatı olub.

 

Tədbir iştirakçıları öncə hər iki təşkilatın son vaxtlar nəşr etdirdiyi kitabların sərgisi ilə tanış olublar.

 

Tarixi faktlarla, xəritə və fotolarla zənginləşdirilmiş kitabın müəllifi Hacı Nərimanoğlu çıxışında QHT Şurasının Ermənistanın ölkəmizə qarşı təcavüzünün, havadarlarının yardımı ilə xalqımıza qarşı törətdiyi soyqırım siyasətinin ifşa edilməsinə həsr olunan layihələrin  həyata keçirilməsinə xüsusi önəm verdiyini diqqətə çatdırıb.

 

Müəllif bildirib ki, elmi-populyar nəşrdə vətənimizin dilbər guşəsi olan Zəngəzurun tarixinə dair arxiv materiallarına, yerli və xarici mənbələrə istinad edilib, bölgənin tarixinə dair 100 sual cavablandırılıb.  O qeyd edib ki, kitabda Zəngəzur bölgəsinin tarixi xəritələri, təbiəti, abidələri, görkəmli şəxsiyyətlərinin 100 fotosu yer alıb, nəşrin PDF variantı zengezur.com saytında yerləşdirilib.

 

Tədbirdə çıxış edənlər nəfis tərtibatlı nəşrin Zəngəzur bölgəsinin Azərbaycan türklərinin əzəli torpağı olduğunun faktlarla ictimaiyyətə çatdırılması, ümümilikdə vətəndaşlarımızın elmi-tarixi, humanitar biliklərinin artırılması və maariflənməsi üçün dəyərli töhfə kimi qiymətləndiriblər.

 

Təqdimatda kitabın lakonik, sadə və aydın üslubda yazıldığı, tədqiqatçılar, tarixçilər, müəllim və tələbələr, eləcə də geniş oxucu auditoriyası üçün nəzərdə tutulduğu diqqətə çatdırılıb.

 

“Zəngəzur” tarixi-elmi sənədli filmi haqqında da məlumat verilib və tarixi həqiqətlərin daha geniş auditoriyaya çatdırılmasında filmin əhəmiyyətindən danışılıb.

 

Sonda Mərkəzi Elmi Kitabxanaya və tədbir iştirakçılarına birliyin indiyədək nəşr etdirdiyi kitablar çap və elektron formatda hədiyyə edilib.

 



09.07.2019 | 19:26