Sağlamlıq imkanları məhdud uşaqlar “Ürəklərə gedən ipək yol” layihəsində

Təhsil Nazirliyinin “Təhsildə inkişaf və innovasiyalar üzrə 3-cü qrant müsabiqəsi”nin qalibi Rəsidə Məmmədovanın “Ürəklərə gedən ipək yol” layihəsi başa çatıb. Layihənin yekunu ilə bağlı Lənkəran şəhər 8 nömrəli tam orta məktəbində təhsil ictimaiyyəti üçün tədbir keçirilib. Masallı, Astara və Lerik rayonlarının təhsil işçilərinin də dəvət olunduğu tədbirdə 70 nəfərdən çox təhsil işçisi iştirak edib.

 

Layihə rəhbəri R.Məmmədova dövlətin təhsilə qayğısından, Təhsil Nazirliyinin innovativ müəllimlərin aşkar edilməsi üçün həyata keçirdiyi layihələr və “Təhsildə inkişaf və innovasiyalar üzrə qrant müsabiqəsi”nin təhsilə verdiyi töhfələrdən danışıb.  O, həmçinin qalib olduğu layihə və layihənin məqsədləri, bu çərçivədə görülən işlərdən söz açıb, layihəyə cəlb olunan sağlamlıq imkanları məhdud şagirdlərin müəyyən edilərək, milli- mənəvi dəyərlərimizin simvolu olan xalça sənətinin onlara öyrədilməsindən bəhs edib. Tədbirdə  sağlamlıq imkanları məhdud olan 5 nəfər şagirdin xalçaçılıq sənəti üzrə təlim prosesini  əks etdirən qısa videorolik təqdim olunub.

 

Xalçaçılıq üzrə 3 aylıq təlim kursu keçən 5 nəfər sağlamlıq imkanları məhdud şagirdə sertifikatlar və müxtəlif hədiyyələr təqdim edilib.

 

Tədbirin yekununda Lənkəran rayonunun müxtəlif məktəblərində fəaliyyət göstərən özfəaliyyət dərnəklərinin, həmçinin Həqiqət Rzayeva adına musiqi məktəbinin şagirdləri tərəfindən hazırlanan rəqs və musiqi nömrələri iştirakçılara təqdim olunub.

 

Layihənin həyata keçirilməsində məqsəd sağlamlıq imkanları məhdud olan şagirdlərin özlərini cəmiyyətdə yararlı insanlar kimi hiss etmələri, onlarda peşə və sənət vərdişlərinin aşkar edilməsi, həmin şagirdlərin gələcəkdə məşğulluğunu təmin etməkdən ibarətdir.



03.02.2020 | 15:26